စာပိုဒ် (ဍ)
ထိုသို့ ကျွန်ုပ်နှင့် လိုင်စီငယ်တို့ တီးတိုးပြောဆိုနေကြသောအခါ ဆရာတိစိပသည် ကြားဝင်၍ အချင်းဆော့ခရတ္တိ၊ အသင်တို့ နှစ်ဦးတည်း တိုးတိုးကျိတ်၍ ကြည်နူးနေကြသည်မှာ မသင့်ပါ။ အကျွန်ုပ်တို့ကော မပါကြရဘူးလော။
အချင်း တိစိပ၊ အကြောင်းထူး မဟုတ်ပါ။ ပါချင်ကြလျှင် အသင်တို့လည်း ပါနိုင်ကြပါသည်။ ကျွန်ုပ်ဆိုခဲ့သော စကားစုတွင် လိုင်စီငယ်က သူနားမလည်သော အချက် ပါကြောင်း၊ ထိုအချက်ကို မီနီဇိန သိသည်ဟု သူ ထင်ကြောင်း၊ ထို့ကြောင့် မီနီဇိနကို ကျွန်ုပ်က မေးကြည့်သင့်ကြောင်း လိုင်စီငယ်က ကျွန်ုပ်ကို တိုးတိုးတိတ်တိတ် သွေးဆောင်နေခြင်းမျှသာ ဖြစ်ပါသည်။
ဆော့ခရတ္တိ၊ ထိုသို့ဖြစ်လျှင်လည်း အသင့်ကိုယ်တိုင် မီနီဇိနကို မေးကြည့်ပါဟု တိစိပက ကျွန်ုပ်ကို တိုက်တွန်းသည်ဖြစ်ရာ ကျွန်ုပ်က မေးကြည့်မည်ဟုပင် ကျွန်ုပ် စိတ်ကူးနေပါသည်။ အချင်း မိနီဇိန၊ ကျွန်ုပ်မှာ မေးစရာတစ်ခု ရှိနေပါသည်။ အသင် ဖြေမည်လော။ သို့ရာတွင် မမေးခင် ကျွန်ုပ် ပြောစရာရှိ၍ ပြောချင်ပါသေးသည်၊ ပြောခွင့်ပေးပါ။ ကျွန်ုပ် ပြောချင်သည်မှာ ဤသို့ဖြစ်သည်။ ကလေးအရွယ်မှစ၍ ကျွန်ုပ် တောင့်တခဲ့သော အရာတစ်ခုသည် ကျွန်ုပ်မှာ ရှိသည်။ လူတိုင်းလူတိုင်း၌ တောင့်တအပ်သော အရာတစ်ခုခုသည် ရှိတတ်သည် မဟုတ်ပါလော။ အချို့သည် မြင်းကောင်းကို တောင့်တကြသည်။ အချို့သည် ခွေးကောင်းကို တောင့်တကြသည်။ အချို့သည် ရွှေငွေဥစ္စာတို့ကို တောင့်တကြသည်။ အချို့သည် ဂုဏ်ထူး အမည်ထူးတို့ကို တောင့်တကြသည်။ ကျွန်ုပ်သည် ထိုအရာများအနက် မည်သည့်အရာကိုမျှ လိုလိုချင်ချင် မဖြစ်ခဲ့။ မိတ်ဆွေကိုသာ ကျွန်ုပ် တတောင့်တတ ဖြစ်ခဲ့သည်။ မိတ်ဆွေကို ရလျှင် ကျွန်ုပ် ကျေနပ်ပါပြီ။ ကြက်ကောင်း ဟူ၍ ရှိသည်။ ငုံးကောင်း ဟူ၍ ရှိသည်။ သို့ရာတွင် ကျွန်ုပ်သည် မိတ်ဆွေကို ကြက်ကောင်း၊ ငုံးကောင်းတို့နှင့် မလဲပါ။ မြင်းချောမြင်းလှ၊ ခွေးချောခွေးလှတို့နှင့်လည်း မလဲပါ။ ကျိကျိတက် ကြွယ်ဝသော ဒရိအ မင်းကြီး၏ ရွှေငွေဥစ္စာတို့နှင့်လည်း မလဲပါ။ ဒရိအ မင်းအဖြစ်နှင့်ပင် မလွဲပါ။ ကျွန်ုပ်သည် ထိုမျှလောက် မိတ်ဆွေကို အလိုရှိသူ ဖြစ်သည်။ အချင်း မီနီဇိန၊ အသင်နှင့် လိုင်စီငယ်တို့သည် ပျိုမျစ်နုနယ်သောအရွယ်၌ပင် သောဟဇ္ဇဟု ဆိုအပ်သော မိတ်ဆွေ၏ အဖြစ်ကို ရခဲ့ကြပြီ။ အသင်ကလည်း လိုင်စီငယ်၏ မိတ်ဆွေအချစ်ကို ရခဲ့ပြီ မဟုတ်ပါလော။ ထိုသို့သော အသင်တို့နှစ်ဦးကို ကျွန်ုပ် တွေ့ရမြင်ရသောအခါ ကျွန်ုပ် အတိုင်းမသိ အံ့သြခြင်း ဝမ်းမြောက်ခြင်း ဖြစ်မိသည်။ ကျွန်ုပ်သည် အသက်အရွယ်အားဖြင့် တစ်ဆိတ်ဟိုင်းခဲ့ပြီ ဖြစ်သော်လည်း အသင်တို့နှစ်ဦး ရခဲ့သော ရတနာမျိုးကို ယနေ့အထိ ကျွန်ုပ် မရခဲ့ပါ။ မိတ်ဆွေဖြစ်အောင် မည်သို့ ပြုရသည်ကို ကျွန်ုပ် လားလားမျှ မသိပါ။ အသင်တို့နှစ်ဦးသည် မိတ်ဆွေဖြစ်လာကြသော ကိစ္စတွင် အတွေ့အကြုံ ရှိခဲ့သူများ ဖြစ်ကြသည်။ ထို့ကြောင့် အသင်တို့ကို ကျွန်ုပ် မေးကြည့်ချင်ပါသည်၊ မေးပါရစေ။ အချင်း မီနီဇိန၊ မိတ်ဆွေဖြစ်ကြသည့်ကိစ္စတွင် မည်သူ့ကို မိတ်ဆွေဟု ဆိုသင့်ပါသနည်း။ ချစ်နေသူက မိတ်ဆွေလော၊ အချစ်ခံရသူက မိတ်ဆွေလော။ နှစ်ဦးစလုံးကိုပင် မိတ်ဆွေဟု ဆိုရမည်လော။ အသင်တို့၏ အတွေ့အကြုံအရ ပြောပါဘိ။
စာပိုဒ် (ဎ)
ဆော့ခရတ္တိ၊ နှစ်ဦးစလုံးကိုပင် မိတ်ဆွေဟု ဆိုရမည် ထင်သည်။
မီနီဇိ၊ တစ်ဦးကသာ ချစ်သည်ဖြစ်ပါက ပသို့နည်း။ နှစ်ဦးစလုံးကိုပင် မိတ်ဆွေဟု အသင် ဆိုဦးမည်လော။
ထိုသို့ပင် ဆိုချင်ပါသေးသည်။
ချစ်နေသူက ချစ်ပါသော်လည်း အချစ်ခံရသူက ပြန်မချစ်သောသဘောမျိုး မရှိနိုင်ပြီလော။
ဆော့ခရတ္တိ၊ ရှိနိုင်ပါသည်။
ထို့ပြင် ချစ်နေသူသည် အချစ်ခံရသူ၏ အမုန်းကိုပင် ခံရတတ်သေးသည် မဟုတ်ပါလော။ ချစ်နေသူသည် တစ်ခါတစ်ရံ ထိုသို့သော ကိစ္စမျိုးနှင့် ကြုံရတတ်သည်ဟု ကျွန်ုပ် ထင်သည်။ ချစ်နေသူသည် အစွမ်းကုန် ချစ်ပါ၏၊ သို့ရာတွင် အတုံ့အပြန် အချစ်မခံရဟုသော်လည်းကောင်း၊ အမုန်းကိုပင်ခံရ၏ဟုသော်လည်းကောင်း သူ သိသလိုလို ဖြစ်လာသောအခါ သူ့မှာ စိတ်မသက်မသာ ဖြစ်ရရှာသည်။ ထိုစကား မှန်ပါသလော။
မှန်ပါသည်။ ထိုသို့ပင် ဖြစ်တတ်ပါသည်။
ကောင်းပြီ။ ထိုသို့ ဖြစ်တတ်သော ကိစ္စမျိုးတွင် ချစ်နေသူဟု လည်းကောင်း၊ အချစ်ခံရသူဟု လည်းကောင်း လူနှစ်ဦးရှိရသည် မဟုတ်ပါလော။
ဟုတ်ပါသည်။ ရှိရမည်သာ။
ကောင်းပြီ။ ချစ်နေသူနှင့် အချစ်ခံရသူနှစ်ဦး ရှိသည့်အနက် မည်သူသည် မိတ်ဆွေဖြစ်ပါသနည်း။ ချစ်နေသူသည် အချစ်မခံစေကာမူ သို့တည်းမဟုတ် အမုန်းခံရစေကာမူ ထိုချစ်နေသူကို အချစ်ခံရသူ၏ မိတ်ဆွေဟု အသင်ဆိုမည်လော။ သို့တည်းမဟုတ် အချစ်ခံရသူကို ချစ်နေသူ၏ မိတ်ဆွေဟု အသင်ဆိုမည်လော။ သို့တည်းမဟုတ် အတုံ့အပြန်ချစ်ခြင်းရှိသည် မဟုတ်လျှင် နှစ်ဦးစလုံးကိုပင် မိတ်ဆွေမဟုတ်ဟု မဆိုနိုင်ပြီလော။
ဆော့ခရတ္တိ၊ နှစ်ဦးစလုံးကိုပင် မိတ်ဆွေမဟုတ်ဟု ဆိုရတော့မည်ကဲ့သို့ပင်။
ထိုသို့ဆိုလျှင် ကျွန်ုပ်တို့၏ ယခု အယူအဆသည် ကျွန်ုပ်တို့၏ ယခင် အယူအဆနှင့် မတူ ဖြစ်နေသည်။ ယခင်ကသော် တစ်ဦးကသာ ချစ်နေစေကာမူ နှစ်ဦးစလုံးကိုပင် မိတ်ဆွေဟု ဆိုခဲ့ကြသည်။ ယခုမူ အတုံ့အပြန် ချစ်ခြင်းရှိသည် မဟုတ်လျှင် နှစ်ဦးစလုံးကိုပင် မိတ်ဆွေမဟုတ် ဖြစ်နေချေပြီ။ ပသို့နည်း။
ဆော့ခရတ္တိ၊ နှစ်ဦးစလုံးပင် မိတ်ဆွေမဟုတ်ဟု ဆိုသည်က မှန်သယောင်ယောင်။
