ပျားရည် ကို လိုသော် ပျားအုံ ကို မဖျက်နှင့် (အပိုင်း-၂)
လူဆိုးများထဲတွင် ကရိုလီတစ်ဦးတည်းသာ ထူးထူးကဲကဲ ထိုကဲ့သို့ စိတ်ထားသည်ဟု သင်ယူဆခဲ့ပါလျှင် နောက်လူဆိုးကြီး တစ်ဦး၏ အကြောင်းကို နားထောင်ဦးလော့။
‘လူများအား ပျော်ရွှင်မှုများကို ခံစားစေခြင်း၊ သူတို့အား သက်သာချောင်ချိစွာ နေနိုင်စေရန် ကူညီခဲ့ခြင်းတို့ဖြင့် ကျွန်ုပ်၏ အလွန်အဖိုးတန်ဆုံးသော အချိန်များကို ကုန်လွန်စေခဲ့၏။ ထိုသို့လုပ်၍ ရသောဆုမှာ လူတို့၏ မုန်းတီးခြင်းနှင့် လူတွေ့မခံနိုင်သော ဘဝဆိုးတို့ပင် ဖြစ်လေသည်’ ဟု အယ်ကပုန်းက ပြောပြဖူး၏။ ထို အယ်ကပုန်းသည်လည်း ရှီကာဂိုမြို့တွင် ရှိရှိသမျှသော လူဆိုးများထဲတွင် အယုတ်မာဆုံးသော လူဆိုးဗိုလ်ကြီးဖြစ်၍ အမေရိကန်ပြည် တစ်ပြည်လုံး၏ ရန်သူအမှတ်တစ် ဖြစ်လေသည်။ အယ်ကပုန်းသည်လည်း သူ့ကိုယ်သူ အပြစ်မတင်၊ အထင်မှားခံခဲ့ရ၍ ကျေးဇူးအတင်မခံရသော ပြည်သူပြည်သားတို့၏ ကျေးဇူးရှင်တစ်ဦး ဖြစ်သည်ဟု သူ့ကိုယ်ကိုယ်သူ ယုံကြည်စွဲလမ်းလျက် ရှိ၏။
နယူးယောက်မြို့၏ အလွန်ဆိုးသွမ်းသော ဒပ်ချ်လူမျိုး ရှပ်ဇ် ဆိုသူ လူဆိုးကြီးတစ်ဦးအား အခြားလူဆိုးများက သေနတ်ဖြင့် ဝိုင်း၍ ပစ်ပြီးသည့်နောက် သတင်းထောက်တစ်ဦးက သွားရောက်မေးမြန်းရာ သူသည် လူများ၏ကျေးဇူးရှင်တစ်ဦးဖြစ်သည်ဟု ထုတ်ဖော်ပြောဆိုလေသည်။ ထိုသို့ ပြောသည့်အတိုင်းလည်း စွဲလမ်းယုံကြည်လျက် ရှိသည်။
ထိုပြဿနာနှင့်စပ်လျဉ်း၍ ဆင်းဆင်းထောင်မှူးကြီး လောစ် နှင့် ကျွန်ုပ်တို့သည် စိတ်ဝင်စားဖွယ် စာပေးစာယူ ပြုလုပ်ဖူး၏။
‘ဆင်းဆင်းထောင်ထဲရှိ အနည်းငယ်မျှသော အကျဉ်းသမားများသာလျှင် သူတို့ကိုယ်သူတို့ လူဆိုးများဟု အယူရှိကြလေသည်။ သူတို့လည်း ခင်ဗျားနှင့် ကျွန်တော်တို့ကဲ့သို့ သွေးနှင့်သားနှင့် လူများဖြစ်ကြ၏။ ထို့ကြောင့် သူတို့သည် သူတို့၏ အပြစ်များကို ကာ၍ ဆင်ခြေပေးကြ၏။ ရှင်းလင်းကြ၏။ သူတို့သည် အဘယ်ကြောင့် သံသေတ္တာများကို ဖောက်ရသည်၊ ဘာကြောင့် သေနတ်နှင့် ပစ်ရသည်တို့ကို ပြောပြပါလိမ့်မည်။ များစွာသော အကျဉ်းသမားများမှာမူကား မဆီမဆိုင်သည့် ဆင်ခြေများကို ဆီလျော်သည့် ဆင်ခြေများနှင့် ရော၍ပေးကြလေသည်။ သူတို့၏ ပြစ်ချက်များမှာ မတရားကြောင်း ထိုပြစ်ချက်များအတွက် ထောင်အကျမခံသင့်ကြောင်းများကိုပင် အခိုင်အမာ ပြောဆိုလျက် ရှိကြ၏’ ဟု ထောင်မှူးကြီးက ရေးသားခဲ့ဖူး၏။
အကယ်၍ အယ်ကပုန်း၊ သေနတ် နှစ်လက်ကိုင် ကရိုလီ၊ ဒပ်ချ်ရှပ်ဇ်မှစ၍ ထောင်အတွင်း အကျဉ်းခံနေရသော လူဆိုးများသည် ကိုယ့်ကိုယ်ကို အပြစ်ရှိသည်ဟု မထင်ကြလျှင် သင်နှင့် ကျွန်ုပ်တို့ နေ့စဉ် ပေါင်းသင်း ဆက်ဆံလျက်ရှိသော လူများမှာကား အဘယ်ဆိုဖွယ်ရာ ရှိပါအံ့နည်း။
