တစ်ဖက်သား၏ အပြစ်သည် ပြင်ရန်မခက်ခဲ ဟု ထင်လာအောင် ပြုလုပ်ပေးပါ

များမကြာမီက ကျွန်ုပ်၏မိတ်ဆွေ အသက် ၄၀ အရွယ်လူပျိုကြီးသည် အိမ်ထောင်ပြုရန် စေ့စပ်လမ်းကြောင်း ပြီးလေ၏။ သူနှင့် စေ့စပ်ထားသော မိန်းမက အကသင်ရမည်ဟု ပူဆာသောကြောင့် လူပျိုကြီးသည် အကသင်ဆရာတစ်ဦးကို ငှား၍ သင်လေသည်။ အနှစ် ၂၀ လောက်က တတ်ကျွမ်းခဲ့သော ထိုလူပျိုကြီး၏အကသည် ခေတ်နောက်ကျလျက် ရှိ၏။ ထို့ကြောင့် ထိုခေတ်မမီသော အကကို တစ်ခါတည်းစွန့်လိုက်ပြီးလျှင် နည်းသစ်များကို အစမှ ပြန်၍သင်ရမည်ဟု ဆရာသည် လူပျိုကြီးအား ပြောကြား၏။ လူပျိုကြီးသည် စိတ်အပျက်ကြီးပျက်၍ ထိုအကဆရာနှင့် ဖြတ်လိုက်၏။

ဆရာအသစ်ကို ထပ်၍ငှားသောအခါ ထိုဆရာသည် ကျွန်ုပ်အား မဟုတ်မမှန်သော စကားများကို ပြောကောင်းပြောရမည်။ သို့သော်လည်း ထိုဆရာ၏ စကားများကို ကျွန်ုပ်ကြိုက်၏။ ‘အင်း ရှင့်အကဟာ နည်းနည်းတော့ ခေတ်မမီဘူးလို့ ဆိုကောင်းဆိုရမှာပေါ့လေ၊ သို့ပေမယ့် အကမှာ အရေးကြီးတဲ့ အချက်တွေကတော့ အကုန်မှန်တာပါပဲ၊ ဒီလောက်တတ်ထားရင် နည်းသစ်တွေကို သင်ဖို့ မခဲယဉ်းတော့ဘူး’ အစရှိသည်ဖြင့် ဆရာသစ်သည် ကျွန်ုပ်အား ပြောလေသည်။

ပထမဆရာသည် ကျွန်ုပ်၏အပြစ်များကို ထင်ရှားအောင် ထုတ်ဖော်ပြောဆိုခြင်းဖြင့် ကျွန်ုပ်ကို စိတ်ပျက်စေ၏။ ဒုတိယဆရာမှာမူကား ပထမဆရာနှင့် ဆန့်ကျင်ဘက်ကို ပြုလုပ်၏။ ကျွန်ုပ်၏အမှန်များကို မဆုံးနိုင်အောင် ချီးကျူးလျက်ရှိ၍ အမှားများကိုမူကား လျစ်လျူရှုလျက် ရှိလေသည်။ ‘ရှင်ဓာတ်ခံထဲမှာကို စည်းဝါးနားလည်တဲ့ အသိဉာဏ် ကပ်နေတယ်၊ ရှင်ဟာက မစားလို့သာပေါ့၊ အမှန်စင်စစ်မှာတော့ ရှင်ဟာ အကဘက်မှာ ပါရမီထူးလာတဲ့ လူတစ်ယောက်ပဲ’ အစရှိသည်ဖြင့် ကျွန်ုပ်ကို အားပေးလျက် ရှိ၏။

ကျွန်ုပ်သည် စတုတ္ထတန်းစား အကသမားမျှသာ ဖြစ်ကြောင်း ကျွန်ုပ်ကိုယ်တိုင် ကောင်းစွာသိပါလျက် ကျွန်ုပ်၏ စိတ်တွင်းတွင်မူကား ‘အေးလေ၊ သူတကယ်ပြောတာ ထင်ပါရဲ့’ ဟူ၍ တွေးချင်သောဆန္ဒသည် ပေါ်လာလေသည်။ အမှန်စင်စစ်ပြောရလျှင် ဤကဲ့သို့ပြောရန်အတွက် သူ့ကိုပိုက်ဆံပေး၍ အကသင်ခိုင်းခြင်း ဖြစ်လေသည်။ ဘာပဲဖြစ်ဖြစ် ကျွန်ုပ်၏ စိတ်ဓာတ်ခံထဲမှာကို စည်းဝါးနားလည်တဲ့ အသိဉာဏ် ကပ်နေတယ်ဟူသော သူ့စကားကို ကြားရသောအခါမှ အစပြု၍ ကျွန်ုပ်တွင် အကတိုးလာသည်မှာ ကျွန်ုပ်ကိုယ်တိုင် သိရှိရ၏။ ထိုစကားသည် ကျွန်ုပ်ကို များစွာ အားပေးခဲ့၏။ ထိုစကားများသည် ကျွန်ုပ်ကို မျှော်လင့်ချက်များ ပေးခဲ့၏။ ထိုစကားများသည် ကျွန်ုပ်ကိုယ်ကို တိုးတက်ကောင်းမွန်စေရန် ကျွန်ုပ်စိတ်ကို ဆွပေးခဲ့၏။

ကလေးကိုဖြစ်စေ၊ လင်ယောက်ျားကိုဖြစ်စေ၊ အစေခံတစ်ဦးဦးကိုဖြစ်စေ ကိစ္စတစ်ခုခုတွင် အ,သည် န,သည် ဟု လည်းကောင်း၊ ဒီကိစ္စကိုလုပ်လျှင် အမှားမှားအချော်ချော် ဖြစ်မည်ဟူ၍လည်းကောင်း ပြောကြားပါလျှင် ထိုအပြောခံရသူ၏ စိတ်ထဲတွင် ရှိသမျှသော တိုးတက်ကောင်းမွန်အောင် စွမ်းဆောင်လိုသည့် ဆန္ဒမှန်သမျှကို အသေသတ်ပစ်လိုက်သည်နှင့် အတူတူပင် ဖြစ်၏။ ထို့ကြောင့် ထိုနည်းကို မသုံးပါနှင့်။

အားပေးစကားများကို ရက်ရောစွာ ပြောနိုင်ကြပါစေ။ လုပ်ရန်ကိစ္စသည် လွယ်ကူပါသည်ဟု သဘောပေါက်အောင် ပြောပေးပါ။ ထိုကိစ္စကို ဆောင်ရွက်ရန်အတွက် သူ့မှာ စွမ်းရည်သတ္တိရှိကြောင်း သင်ယုံကြည်သည်ဟု တစ်ဖက်သားအား အသိပေးပါ။ သူကိုယ်တိုင်က မသိသေးသော်လည်း  သူ့မှာ ဤကိစ္စကို ဆောင်ရွက်နိုင်ရန်အတွက် မီးခဲပြာဖုံး စွမ်းရည်သတ္တိရှိကြောင်းကိုလည်း တစ်ဖက်သားအား သိရှိပါစေ။ ဤကဲ့သို့သော ပြုလုပ်ပေးပါလျှင် ထိုကိစ္စကို သင်ထင်သည့်အတိုင်း ဆောင်ရွက်ရန်အတွက် ထိုသူသည် အာရုဏ်ကျင်း၍ အလင်းပေါ်သည့်တိုင်အောင် မအိပ်ဘဲ လေ့ကျင့်ပေလိမ့်မည်။

ဤနည်းကို လိုဝဲသောမတ်သည် အသုံးပြုခဲ့ဖူး၏။ သောမတ်သည် လူချင်းပေါင်းသင်း ဆက်ဆံသည့်အတတ်တွင် ဝိဇ္ဖာဓိုရ် ရလေသည်။ သူသည် သင့်ကို ပြုစုပျိုးထောင်ပေးလိမ့်မည်။ သင့်ကို ယုံကြည်စိတ်ချသော စိတ်ဓာတ်များ မွေးမြူအောင် စွမ်းဆောင်ပေးလိမ့်မည်။ သတ္တိနှင့် ဇွဲကောင်းလာအောင် ရှေ့ဆောင်လမ်းပြပေးလိမ့်မည်။

သက်သေသာဓကတစ်ခုကို ထုတ်ပြပါအံ့။ များမကြာမီက ကျွန်ုပ်သည် မစ္စတာနှင့်မစ္စက်သောမတ်တို့၏ အိမ်တွင် တနင်္ဂနွေတစ်ပတ်လောက် သွားရောက်နေထိုင်ခဲ့ဖူး၏။ စနေနေ့ညတွင် ကျွန်ုပ်အား ဘရစ်ခေါ် အင်္ဂလိပ်ဖဲကစားနည်းတစ်မျိုးကို ဝင်၍ကစားရန်ခေါ်လေသည်။ ကျွန်ုပ်သည် ဘရစ်ကို အလျဉ်းမကစားသဖြင့် မကစားပါရစေနှင့်ဟု ဇွတ်ငြင်းလေသည်။

ထိုအခါ ‘ဟာဒေးကလည်း ဒီကစားမျိုးဟာ ဘာခက်လို့လဲ၊ မှတ်ဉာဏ်ကောင်းပြီး အဆုံးအဖြတ်တတ်ရင် ကစားနိုင်တာပဲ၊ တစ်ခါတုန်းက ဒေးပဲ မှတ်ဉာဏ်အကြောင်းကို ဆောင်းပါးတစ်စောင် ရေးဖူးတယ် မဟုတ်လား၊ ကစားကြည့်လေ၊ ခင်ဗျားနဲ့တော့ ဒီဘရစ်ဟာ အတော်ဆုံးနေမှာပဲဗျို့’ ဟု သောမတ်က ပြန်ပြောလေသည်။

ထိုစကားကို ကြားရသည်နှင့် ကျွန်ုပ်သည် တစ်ခါဖူးမျှ မကစားဘူးသော ဘရစ်ကို ဝင်၍ကစားခဲ့၏။ ဘရစ်အကြောင်းကို ပြောသောကြောင့် ဘရစ်အကြောင်းကို စာအုပ်ရေး၍ရောင်းသော အီးလီ ကာဘတ်ဆန်၏ အကြောင်းကို ပြေး၍ သတိရမိ၏။ ဘရစ်ကို ကစားသူတိုင်းသည် အီးလီ ကာဘတ်ဆန်ကို မသိဘူးမရှိချေ။ သူ၏စာအုပ်ကို ၁၂ မျိုးထက်မနည်း ဘာသာပြန်၍ မိန်းမတစ်ယောက်ကသာ ကာဘတ်ဆန်တွင် ဘရစ်ကစားနိုင်သော စွမ်းရည်သတ္တိ အများကြီးရှိသည်ဟု အားပေးစကားမပြောကြားလျှင် ဤကဲ့သို့ စာအုပ်ထုတ်၍ ရောင်းနိုင်သောအခြေအနေသို့ ရောက်မည်မဟုတ်ဟူ၍ ကာဘတ်ဆန်ကိုယ်တိုင်က ထုတ်ဖော်ပြောဆိုဖူးလေသည်။

သူသည် ၁၉၂၂ ခုနှစ်တွင် အမေရိကန်နိုင်ငံသို့ ရောက်လာလေသည်။ အမေရိကန်နိုင်ငံတွင် ကျောင်းဆရာအလုပ်ကို ရှား၍မရရှိခဲ့ပေ။ ထို့နောက် ကျောက်မီးသွေးရောင်းရန် ကြိုးစားခဲ့၏။ အထ မမြောက်ခဲ့ချေ။ ထို့ပြင် ကော်ဖီရောင်းရန် ကြံစည်ပါသော်လည်း ယခင်အလုပ်များနှင့် ထူးမခြားမနားလှပေ။

ထိုစဉ်အခါက ဘရစ်ကစားနည်းကို သင်ပေးခြင်းဖြင့် အသက်မွေးတော့မည်ဟူ၍ ကာဘတ်ဆန်သည် စိတ်ပင်မကူးခဲ့ချေ။ အဘယ့်ကြောင့်ဆိုသော် သူကိုယ်တိုင် ကောင်းစွာမကစားတတ်သေးရုံမျှမက ကစားရာတွင်လည်း အလွန် ‘ကြေး’ ထူသောကြောင့် သူနှင့် ဘယ်သူမျှမကစားချင်ကြပေ။

များမကြာမီက သူသည် ဂျိုးဆက်ဖင့် ဒီလန် ဆိုသူ ဘရစ် ကစားနည်းသင်ပြသော ဆရာမတစ်ဦးနှင့်တွေ့၍ တစ်ဦးနှင့်တစ်ဦး စုံမက်ကြပြီးလျှင် လက်ထပ်ကြ၏။ ဘရစ် ကစားရာတွင် ကာဘတ်ဆန်သည် အမှုမဲ့အမှတ်မဲ့မကစားဘဲ အပြန်ပြန်အလှန်လှန် စူးစမ်းဝေဖန်တတ်သော အလေ့ရှိသည်ကို တွေ့ရသောအကြောင့် ဘရစ်ကစားနည်းတွင် ကာဘတ်ဆန်သည် ပါရဂူတစ်ဦး ဖြစ်နိုင်သည်ဟု သူ၏မိန်းမက အားပေးစကား ပြောကြား၏။ ကာဘတ်ဆန် ယခုအခြေအနေသို့ ရောက်လာရခြင်းမှာ အခြားကြောင့်မဟုတ်။ သူ့မိန်းမ၏ အထက်ပါ အားပေးစကားတစ်ခုတည်းကြောင့်သာ ဖြစ်သည်ဟု သူကိုယ်တိုင်က ပြန်ပြောဖူးလေသည်။

ထို့ကြောင့် တစ်ဖက်သားကို မျက်မုန်းမကျိုး စိတ်မဆိုးစေဘဲ စိတ်ပြောင်းလာအောင် လုပ်လိုလျှင် အားပေးစကားကို ပြောကြားပါ။ သင် ပြင်လိုသော တစ်ဖက်သား၏ အမှားသည် ပြင်ရန်လွယ်ကူသည်ဟု တစ်ဖက်သား သဘောပေါက်အောင် ပြောပါ။ သင် လုပ်စေချင်သောအလုပ်မှာ လုပ်ရန်လွယ်ကူသည့် အကြောင်းကိုလည်း တစ်ဖက်သား သဘောပေါက်ပါစေ။

မူရင်းရေးသားသူ DALE CARNEGIE | ဘာသာပြန်ဆိုသူ ဦးနု၏ မိတ္တဗလဋ္ဋီကာစာအုပ်မှ ကူးယူဖော်ပြသည်။