အလွန်ရှင်း အလွန်ထင်ရှားလွန်းသော စကားဖြစ်သောကြောင့် မြင်လိုက်ရုံနှင့် ထိုစကား၏ မှန်ကန်ပုံကို တွေ့နိုင်ပေသည်။ သို့ရာတွင် ရာခိုင်နှုန်း ၉၀ လောက် ကမ္ဘာပေါ်ရှိ လူတို့သည် ထိုစကားကို အကြိမ်ပေါင်း ရာခိုင်နှုန်း ၉၀ လောက် ဂရုမပြုကြချေ။
သက်သေပြရဦးမည်လား။ မနက်ဖြန် နံနက် သင့်ထံ ရောက်လာသော စာများကို ဖတ်ကြည့်ပါ။ များစွာသော စာတို့သည် ဤစည်းမျဉ်း ဥပဒေကိုများစွာ လွန်ကျူးဖောက်ဖျက်ထားသည်ကို တွေ့ရမည် ဖြစ်၏။ အောက်ပါ စာတစ်စောင်ကို ဖတ်ကြည့်ပါ။ ဤစာကို ရေးသူမှာ အမေရိကန်ပြည် အရပ်ရပ်တွင် ဆိုင်ခွဲပေါင်း မြောက်မြားစွာ ဖွင့်လှစ်ထားသော ကြော်ငြာကိုယ်စားလှယ် အလုပ်တိုက်၏ ရေဒီယိုဘက်ဆိုင်ရာဌာနကို အုပ်ချုပ်စီမံနေသူ လူကြီးပင် ဖြစ်လေသည်။ ဤစာသည် အရပ်ရပ်ရှိ သူတို့ဆိုင်ခွဲများ၏ မန်နေဂျာများထံသို့ပို့သော စာဖြစ်လေသည်။ (ဤစာကို တစ်ပိုဒ်စီဖတ်ပြီးသောအခါ စိတ်တွင်ဖြစ်ပေါ်လာပုံတို့ကို စကားချပ်အဖြစ်နှင့် ဖော်ပြပါအံ့။)
မစ္စတာ ဂျွန် ဘလင့်
ဘလင့် ဗီး
အင်ဒီးယားနား။
ချစ်လှစွာသော မစ္စတာ ဗလင့်
ကုမ္ပဏီသည် ရေဒီယိုဘက်တွင် ကြော်ငြာကိုယ်စားလှယ်တို့၏ ခေါင်းဆောင်ဖြစ်မြဲ ဖြစ်လိုသော ဆန္ဒရှိပါသည်။
(သင့်ကုမ္ပဏီ၏ဆန္ဒကို ဘယ်သူက ဂရုစိုက်ဦးမှာလဲ။ ကျွန်ုပ်လည်း ကျွန်ုပ်၏ ကိစ္စများနှင့် စိတ်ရှုပ်လျက်ရှိ၏။ ကျွန်ုပ်၏ အိမ်ပေါင်ထားသည်ကို ဘဏ်တိုက်က ရွေးခွင့်မပြုတော့ဘူး။ အပင်တွေလည်း ပိုးကျနေပြီ။ ငွေဈေးလည်း မနေ့ကကျသွားသည်။ ယနေ့နံနက် ၈နာရီ ၁၅မိနစ် မီးရထားကို လွတ်သွား၏။ မနေ့ညက ဂျုံး၏ ကပွဲသို့ ကျွန်ုပ်ကိုမဖိတ်။ ဆရာဝန်က ကျွန်ုပ်တွင် သွေးတိုးရောဂါ၊ အကြောယောင်ရောဂါနှင့် ဘောက်များရှိသည်ဟု ပြော၏။ ထို့ပြင် စိတ်ရှုပ်စရာများ ဘာရှိသေးသလဲ။ ယနေ့နံနက် စိတ်ညစ်ပြီး အလုပ်တိုက်ကို ဆင်းလာရာ စာအိတ်များကို ဖွင့်လိုက်သောအခါ အလိုက်မသိတတ်သော မန်နေဂျာက သူ့ကုမ္ပဏီသည် ဘာကို အလိုရှိသည်ဟု ရေးလိုက်သော စာတစ်စောင်ကို တွေ့ရပြန်သည်။ ထွီ သူ့စာသည် တစ်ဖက်သား၏ စိတ်ကို ဘယ်လိုဖြစ်သွားစေသည်ကို သူသိလျှင် သူသည် ကြော်ငြာသည့် အလုပ်မှထွက်ပြီး ဖိနပ်သံခွာ ရိုက်စားကောင်း ရိုက်စားပေလိမ့်မည်။)
ဤကုမ္ပဏီ၏ အမျိုးသား ကြော်ငြာလုပ်ငန်းများသည် ထုထည် အကြီးမားဆုံးဖြစ်၏။ လူအသုံးများသဖြင့်လည်း ကြော်ငြာကိုယ်စားလှယ်များထဲတွင် နှစ်စဉ်နှစ်တိုင်း ထိပ်တန်းကျလျက်ရှိလေသည်။
(သင်သည် ကြီးကျယ်၏။ ချမ်းသာ၏။ ထိပ်တန်းကျ၏။ နောက်ပြီး ဘာဖြစ်သေးသလဲ။ အမေရိကန်ပြန်စစ်အဖွဲ့ချုပ် ဂျင်နရယ်အီလက်ထရစ် ဂျင်နရယ်မော်တော် ကုမ္ပဏီသည် ကြီးကျယ်သော်လည်း ကျွန်ုပ် အရေးမလုပ်။ ရူးပေါပေါ ပန်းရည်စုပ်ငှက်ကလေး၏ ထက်ဝက်မျှလောက် ဉာဏ်ရှိမည်ဆိုလျှင် ကျွန်ုပ် မည်မျှ ကြီးကျယ်သည်ကိုသာ ကျွန်ုပ် စိတ်ဝင်စားကြောင်း သင် သိမည်ဖြစ်၏။ သင့်ကုမ္ပဏီ ကြီးကျယ်ခမ်းနားကြောင်းတွေကို ပြောပြခြင်းအားဖြင့် ကျွန်ုပ် စိတ်ငယ်၍ ကျွန်ုပ်ကိုယ့်ကို ကျွန်ုပ် အထင်သေးသွားအောင် သင်လုပ်နေသည်။)
ကျွန်ုပ်တို့၏ ကြော်ငြာရှင်များကို ရေဒီယိုနှင့် စပ်လျဉ်းသမျှသော သတင်းတို့ကို အပြည့်အဝပေးရန် ကျွန်ုပ်တို့ အလိုရှိပါသည်။ (ကျွန်ုပ် အလိုရှိသည်။ ဟုတ်စ။ ကျွန်ုပ် အလိုရှိသည်။ တယ်လာတဲ့ နွားသိုးပဲ။ ခင်ဗျားဖြစ်စေ၊ မူဆိုလီနီဖြစ်စေ၊ ဘင်းကရော့ဖြစ်စေ ဘယ်သူရဲ့အလိုဆန္ဒကိုမျှ ကျွန်ုပ် ဂရုမစိုက်ဘူး။ ကုန်ကုန် ပြောပရစေတော့။ ကျွန်ုပ်သည် ကျွန်ုပ်အလိုရှိသည့် အရာများတွင်သာ စိတ်ဝင်စားလျက်ရှိသည်။ သင်၏ မိုက်မဲသော စာထဲမှာ ယခုထက်ထိ ကျွန်ုပ် အလိုရှိသည့်အရာကို တစ်လုံးတစ်ပါဒမျှ ဖော်မပြသေးဘူး)
ထို့ကြောင့် ကျွန်ုပ်တို့ထံ အပတ်စဉ် သတင်းပို့ပေးရန် သင်၏အထူးစာရင်းတွင် ကုမ္ပဏီအမည်ကို တင်သွင်းထားစေလိုပါသည်။ အချိန်မီရောက်ပါက အကျိုးရှိမည့် မည်သည့်သတင်းမျိုးကိုမဆို ပေးရန် ဖြစ်ပါသည်။ (‘သင်၏ အထူးစာရင်း’ တော်တော်လည်း နှုတ်ရဲတဲ့လူပဲ။ သင့်ကုမ္ပဏီ ကြီးကျယ်ကြောင်းတွေ လျှောက်ပြောနေသည့်အတွက် သင်သည် ကျွန်ုပ်ကိုယ်ကိုကျွန်ုပ် အထင်သေးအောင် လုပ်၏။ ထို့နောက်တစ်ဖန် သင့်ကုမ္ပဏီကို ‘အထူးစာရင်းတွင်’ ထားရန် ကျွန်ုပ်ကို ခိုင်းလိုက်သေး၏။ ခိုင်းသည့်အခါတွင်လည်း ‘ကျေးဇူးပြု၍’ ဆိုသော စကားကလေးကိုမျှ ထည့်ရမှန်း မသိဘူး။)
