ဝါးတားဂိတ် အရှုပ်တော်ပုံ (အပိုင်း – ၄)

ဝါးတားဂိတ် အရှုပ်တော်ပုံ (အပိုင်း – ၄) ~~~~
ကြားမှ အချောင်ဝင်ပြီး ခံလိုက်ရသည် ဆိုခြင်းက ဒီးန်အတွက် ဟုတ်လောက်သည်။ ဧပြီလ ၂၆ ရက်နေ့တွင် အိမ်ဖြူတော်၏ အတွင်းရေးများ သတင်းထောက် ဂျက် အန်ဒါဆင်မှတစ်ဆင့် ပေါက်ကြားသွားခဲ့သည်။ သတင်းများတွင် မစ်ချဲလ်နှင့် ဒီးန်တို့သည် ဖောက်ထွင်းဝင်ရောက်မှုများကို အစမှ အဆုံး အားလုံး သိကြောင်း၊ ဖြစ်စဉ်အားလုံးတွင် စီးလားရိုက်သူများနှင့် နှုတ်ပိတ်ခ လိုက်ပေးသူများမှာ သူတို့နှစ်ဦးသာ ဖြစ်ကြောင်းကို သတင်းစာမှတစ်ဆင့် ဖွင့်ဟလိုက်သည်။ ဒီးန်သည် နစ်ဆင်ကို ဖြစ်ရပ်အားလုံးအတွက် လှည့်စားအသုံးချခဲ့ပြီး အားလ်လစ်ချ်မန်းနှင့် ကာလ်ဆန်တို့သည် အမှန်တရားကို ဖော်ထုတ်ရန် အားထုတ်နေသူများ ဟူ၍လည်း ဆိုထားသည်။

သို့သော် အပြစ်များကို ဤသို့ ဆေးကြောရုံဖြင့် မပြောင်းသွားနိုင်ပေ။ နောက်တစ်နေ့တွင် ပက်ထရစ်ဂရေးသည် အက်ဖ်ဘီအိုင် ခေတ္တဒါရိုက်တာဘဝမှ နုတ်ထွက်သွားတော့သည်။ ဂရေးသည် အားလ် လစ်ချ်မန်းနှင့် ဒီးန်တို့က ပေးသည့် ဟန့်၏မီးခံသေတ္တာထဲမှ ရသော အထောက်အထား စာရွက်စာတမ်းများကို မီးရှို့ဖျောက်ဖျက်လိုက်သည်ဟု အစီရင်ခံစာတွေက ထွက်လာသည်။

၁၉၇၃ ခုနှစ် ဧပြီလ ၃၀ ရက်နေ့တွင် နစ်ဆင်သည် ရုပ်မြင်သံကြားတွင် ဖုံးကွယ်မှု ရှိခဲ့ကြောင်း ဝန်ခံပြောကြားခဲ့သည်။ “ပြည်သူကို အသိမပေးဘဲ ထိမ်ချန်ဖုံးကွယ်ရန် အားထုတ်မိပါသည်” ဆိုသည့် စကားလေးဖြင့် ပြည်သူကို ချွေးသိပ်ခဲ့သည်။ ဖောက်ထွင်းဝင်ရောက်ခဲ့မှုမှာလည်း ‘တရားဥပဒေကို သတိလက်လွတ်ချိုးဖောက်မိခြင်း’ ဟု စကားလှလှလေး သုံးသွားခဲ့သည်။ ထို့ပြင် “ဒီအဖွဲ့ကြီးကို လှုပ်ရှားနိုင်အောင် လုပ်ပိုင်ခွင့် ပေးခဲ့သူကို ကျွန်တော် အပြစ်တင်ပါတယ်၊ ဒါဟာ သူရဲဘောကြောင်တဲ့ လုပ်ရပ်ပါ၊ ဘယ်လူ့ဘောင်အဖွဲ့အစည်းမှာမဆို ဒါမျိုးကို မဖြစ်ဖြစ်အောင် လုပ်ခိုင်းတဲ့ ထိပ်ပိုင်းက လူမှာ တာဝန်ရှိပါတယ်” ဟူ၍လည်း အမေရိကန် ပြည်သူများကို မျက်တောင်မခတ် ပြောကြားခဲ့သည်။

မတ်လ ၂၆ ရက်နေ့အထိ အိမ်ဖြူတော်မှ လူများသည် ဤကိစ္စနှင့် လုံးဝမပက်သက်လေဟန် နစ်ဆင်က အာမခံနေခဲ့သည်။ ယခုတော့ ဟာဒီမန်းနှင့် အားလ်လစ်ချ်မန်းတို့ နုတ်ထွက်မှုကို လက်ခံလိုက်သည်။ “ကျွန်တော့်ကို ကောင်းကောင်း နားလည်တဲ့ ဝန်ထမ်းကောင်း နှစ်ယောက်” ဟူ၍ပင် သူက ဂုဏ်ပြုပြောကြားလိုက်သေးသည်။ “ဘယ်နည်းနဲ့ဖြစ်ဖြစ် ဒီလိုအမှားမျိုးမှာ ပါဝင်ပက်သက်မယ့်လူမျိုးတွေ မဟုတ်ပါဘူး” ဟူ၍လည်း ပြောသည်။ ဂျွန် ဒီးန် နုတ်ထွက်သူနှင့် ပက်သက်၍မူ ထုတ်ပြန်ကြေညာသော်လည်း တစ်စုံတစ်ရာ မှတ်ချက်ပေးမှု မရှိခဲ့ပေ။

“တရားမျှတတဲ့အထိ အပြစ်ရှိသူတွေ အပြစ်ရအောင် ကျွန်တော့်မှာရှိတဲ့ အာဏာကို အစွမ်းကုန် သုံးပြီး လုပ်ဆောင်သွားပါ့မယ်၊ အိမ်ဖြူတော်မှာ ဘာကိုမှ ဖုံးကွယ်ထားမှုမျိုးတွေ မရှိစေရဘူး” ဟု အလေးအနက် ပြောလိုက်သေးသည်။

သို့သော် သူ့အပြောကို မည်သူမျှ ယုံကြည်မှု မရှိ။

ဝါးတားဂိတ်အရှုပ်တော်ပုံ၏ အဆုံးသတ်ခါနီးချိန်တွင် နစ်ဆင်က သတင်းလွတ်လပ်ခွင့်နှင့် ပက်သက်ပြီး အလွန်အမင်း ချီးကျူးဂုဏ်ဖော်ကာ အသံကောင်းတွေ ဟစ်နေတော့သည်။ သတင်းထောက်လေး နှစ်ယောက် ဖြစ်သည့် ဝုဒ်ဝပ်နှင့် ဘားစတိန်းတို့ကိုလည် အိမ်ဖြူတော်မှ သတင်းထုတ်ပြန်ရေးဌာန၏ ပြောရေးဆိုခွင့်ရှိသူ ရွန် ဇိုင်ဂလာက တစ်ဦးချင်း လိုက်တောင်းပန်နေသည်။ အဘယ်ကြောင့်ဆိုသော် သူကိုယ်တိုင် ထိုသတင်းထောက်လေး နှစ်ဦးကို ရစရာမရှိအောင် လိုက်ပြီး သွားပုပ်လေလွင့် ပြောကြားခဲ့သောကြောင့် ဖြစ်သည်။

ယခုတော့ ဟုတ်လို့ ကျော်၊ ပုပ်လို့ ပေါ် ဆိုသလိုမျိုး ဖြစ်လာသည်။ ဟာဒီမန်းနှင့် အားလ်လစ်ချမန်းတို့သည် ဖြစ်ရပ်မှန်ကို သိသည်ဆိုလျှင် နစ်ဆင်လည်း ဤဖြစ်ရပ်ကို မလွဲမသွေ သိရမည်သာ ဖြစ်သည်။ နစ်ဆင်အနေဖြင့် သူ့အရင်းနှီးဆုံး အကြံပေး နှစ်ယောက်ကို စွန့်လွှတ်ရန် ဆန္ဒရှိသည် ဆိုလျှင် အန္တရာယ်နှင့် ကစားခြင်းသာ ဖြစ်လိမ့်မည်။

နောက်တစ်နေ့တွင် အထက်လွှတ်တော်က သမ္မတကို အထူးစုံစမ်းစစ်ဆေးရန် တညီတညွတ်တည်း မဲခွဲဆုံးဖြတ်လိုက်ကြသည်။ ဦးဆောင်သူမှာ အာချီဘောကော့စ် ဖြစ်သည်။ ကော့စ်သည် ဟားဗတ် ဥပဒေကျောင်းမှ ပါမောက္ခတစ်ဦး ဖြစ်ပြီး ပိုဆိုးသည်က ကနေဒီ၏လူ ဖြစ်နေခြင်း ဖြစ်သည်။

ယခုအချိန်တွင် ဝါးတားဂိတ်မှ ပိုက်ပြင်သမားများသည် အဲလ်စ်ဘတ်ဆေးခန်းအတွင်း လျှို့ဝှက်ဝင်ရောက်ခြင်း သတင်းကလည်း ပေါက်ကြားသွားပြီး ထိုအကြောင်းနှင့် ပက်သက်၍ အစိုးရအနေဖြင့် ပြုမူဆောင်ရွက်ချက်များကိုလည်း ထိမ်ချန်ဖျောက်ဖျက်ထားကြောင်း တွေ့ရပြန်သည်။ အားလုံးသော အချက်အလက်များကို ပြန်သုံးသပ်ကြည့်လျှင် ဝါးတားဂိတ် ခိုးဖောက်ဝင်ရောက်မှုတွင် နစ်ဆင်၏ ထိမ်ချန်ဖုံးကွယ်ထားမှုများက ထင်ရှားလာသည်။ အာဗင်ကော်မတီသည် ရုပ်မြင်သံကြားမှတစ်ဆင့် တိုက်ရိုက်ထုတ်လွှင့်ပြီး ကြားနာစစ်ဆေးလျက်ရှိသည်။ သူတို့ အဓိကထားပြီး မေးနေသည့် မေးခွန်းမှာ တစ်ခုတည်း ဖြစ်သည်။ လွှတ်တော်အမတ် ဟိုးဝပ် ဘေကာ လေသံဖြင့် ပြောရလျှင် “သမ္မတ ဘာတွေ သိထားသလဲ၊ ဘယ်အချိန်ကတည်းက သိနေတာလဲ” ဟူ၍ မေးရမည် ဖြစ်သည်။

မက်ကော့က ကော်မတီကို ဘဏ္ဍာရေးဌာနမှ ဂျွန် ကောလ်ဖီးသည် သက်ညှာခွင့်တစ်ခု ယူဆောင်လာကြောင်း၊ ထိုသက်ညှာခွင့်မှာ အိမ်ဖြူတော်၏ အမြင့်ဆုံးအဆင့်မှဟု ပြောကြောင်း၊ အကယ်၍ ဝါးတားဂိတ်နှင့် ပက်သက်ပြီး တရားရုံးတွင် နှုတ်ဆိတ်နေပေးမည် ဆိုလျှင် သက်ညှာခွင့်ပြုမည်ဟု လာရောက် ကမ်းလှမ်းကြောင်း ဖွင့်ဟ ဝန်ခံလိုက်သည်။ ကောလ်ဖီးက ထိုကမ်းလှမ်းချက်သည် ဒီးန်ထံမှ လာခြင်းဖြစ်ပြီး နစ်ဆင်ထံမှ မဟုတ်ကြောင်း ထွက်ဆိုခဲ့သည်။

ဟာဒီမန်းနှင့် အားလ်လစ်ချမန်းတို့ကလည်း ဒီးန်ကိုပင် အပြစ်ဖို့သွားသည်။ သမ္မတအရေးကို ဆွေးနွေးရင်း ၁၉၇၂ ခုနှစ် နွေဦးသို့ ရောက်လာသည်။ ယခုတော့ ဒီးန်ကို ပြန်လည်စုံစမ်းစစ်ဆေးရန် ဖြစ်လာသည်။ ဒီးန်သည် အစစ်ဆေးခံရန် ဒေါသတကြီး ပြန်ရောက်လာသည်။ သူက ကော်မတီကို နစ်ဆင်အား တိုင်းပြည်ရန်သူစာရင်းတွင် ထားရန် ပြောကြားတော့သည်။ ပြည်သူတွေက ဝါးတားဂိတ်အရေးနှင့် ပက်သက်ပြီး အက်ဖ်ဘီအိုင်နှင့် ပြည်တွင်းအခွန်ဌာနတို့ကို စွပ်စွဲတိုက်ခိုက်နေကြသည်။

ဒီးန်က နစ်ဆင်၏ ခိုင်းစေချက်ကြောင့် လုပ်ရပါသည်ဟု စုံစမ်းရေးအဖွဲ့ကို ဝန်ခံပြောကြားခဲ့သည်။ ဝါးတားဂိတ်အရေးတွင် အဓိက တာဝန်အရှိဆုံး ပုဂ္ဂိုလ်မှာလည်း နစ်ဆင်ပင် ဖြစ်ကြောင်း ထွက်ဆိုခဲ့သည်။ သူ့ထွက်ချက်ကို မူတည်ပြီး အက်ဖ်ဘီအိုင်နှင့် တရားရေးဌာနတို့သည် ဖြစ်စဉ်အားလုံးတွင် အိမ်ဖြူတော်၏ ပါဝင်ပက်သက်မှုများကို ပြန်လည် တည်ဆောက်ကြည့်ရသည်။ ဒီးန် ထွက်ချက်အရ ၁၉၇၂ ခုနှစ် စက်တင်ဘာလကတည်းက နစ်ဆင်သည် လှုပ်ရှားမှုများကို စတင်နေခဲ့ကြောင်း၊ မတ်လ ၂၁ ရက်နေ့တွင် ကျင်းပသည့် အစည်းအဝေးတစ်ခုတွင် ဟာဒီမန်းကိုယ်တိုင် ရှိနေပြီး သူက နစ်ဆင်သည် သူ့ကို ဝါးတားဂိတ် ဖောက်ထွင်းရေးသမားများကို နှုတ်ပိတ်ခအနေဖြင့် ဒေါ်လာတစ်သန်း ပေးရလျှင်လည်း ပြဿနာမဟုတ်ကြောင်း ပြောဆိုခဲ့သည်ဟု ဆိုသည်။

ဒီးန်ကို “တိုင်းပြည်၏ အမြင့်ဆုံးပုဂ္ဂိုလ်တစ်ဦးအပေါ် မဟုတ်မဟတ် စွပ်စွဲလျှင် အပြစ်ရှိသည်ကို သိပါ၏လော” ဟု မေးမြန်းခဲ့သည်။ ဒီးန်က “လူတစ်ယောက်က လူတစ်ယောက်အပေါ် ဆန့်ကျင်ပြောဆိုရခြင်းသည် သာမန်လူ မဟုတ်သည့်အတွက် မဖြစ်နိုင်ဟု သဘောပေါက်ပါကြောင်း၊ သို့သော် ယခုအခြေအနေက အလွန် စိတ်မချမ်းသာစရာ အနေအထား ဖြစ်နေကြောင်း” ဖွင့်ဟ ပြောကြားသွားခဲ့သည်။

သို့သော် ဒီးန် ကံကောင်းသည်ဟု ဆိုရမည်။ ဖော်ကောင်က သူတစ်ယောက်တည်း မဟုတ်တော့။ ဟာဒီမန်း၏လက်ထောက် တစ်ယောက်ကလည်း ၁၉၇၃ ခုနှစ် ဇူလိုင်လ ၁၆ ရက်နေ့တွင် ကော်မတီသို့ နစ်ဆင်သည် ပုဂ္ဂလိကရုံးများကို ဖုန်းခိုးနားထောင်ရန်အတွက် အစီအစဉ်များ ချမှတ်ခဲ့ကြောင်း ဖွင့်ဟဝန်ခံခဲ့သည်။ ဆိနိတ် စုံစမ်းရေးကော်မတီနှင့် အစိုးရရှေ့နေများအဖွဲ့က ထိုခိုးယူနားထောင်စဉ် အသံဖမ်းထားသည့် တိပ်ခွေများကို ရုံးတော်သို့ တင်သွင်းရန် ဆင့်ဆိုလိုက်သည်။

ယခုလိုအခြေအနေတွင် နစ်ဆင်သည် တိပ်ခွေများကို ဖျက်ဆီးပြီးလောက်ပြီ ဟု ယူဆပြီးသား ဖြစ်သည်။ သို့သော် ပြစ်မှုအတွင်း ပါဝင်ပက်သက်နေမှုကို ထင်ရှားစေလိုသဖြင့် ထွက်ဆိုရခြင်းသာ ဖြစ်ကြောင်း ပြောကြားခဲ့သည်။ သို့သော် နစ်ဆင်သည် သူ့အတွက် အသုံးဝင်မည့် တိပ်ခွေများကို သိမ်းထားလိမ့်ဦးမည် ဟု သူက ယုံကြည်နေသည်။

၁၉၇၃ ခုနှစ် သြဂုတ်လ ၂၉ ရက်နေ့တွင် တရားသူကြီး ဆီရီကာသည် နစ်ဆင်ကို ဌာနရှစ်ခုမှ ဖမ်းယူထားသည့် အသံသွင်း တိပ်ခွေများကို ရုံးတော်သို့ လွှဲပြောင်းပေးအပ်ရန် အမိန့်ထုတ်သည်။ နစ်ဆင်က အကုန်အပ်ရန် ငြင်းဆိုပြီး အချို့ကိုသာ အပ်မည်ဟု ဝန်ခံကာ မစ္စစ္စပီက နားမကြားသည့် အမတ်တစ်ဦးဖြစ်သူ ဂျွန် စီ စတန်းနစ်ထံမှ ဖမ်းယူထားသည့် တိပ်ခွေကိုသာ တင်ပြခဲ့သည်။ အာချီဘောကော့စ်သည် တိပ်ခွေနှင့် ပက်သက်ပြီး ဘာမျှအသုံးမဝင်တော့သဖြင့် ထို လွှဲပြောင်းတင်သွင်းမှုအပေါ် ကန့်ကွက်ငြင်းဆိုခဲ့သည်။ တုံ့ပြန်သည့်အနေဖြင့် နစ်ဆင်သည် အထူးအစိုးရရှေ့နေအဖွဲ့ကို ဖျက်သိမ်းပြီး တရားသူကြီးချုပ် အီးလီးယော့ ရစ်ချတ်ဆန်အား အာချီဘောကော့စ်ကို တာဝန်မှ ရပ်ဆိုင်းရန် အမိန့်ထုတ်ခိုင်းလိုက်သည်။ တရားသူကြီးချုပ် ရစ်ချတ်ဆန်နှင့် သူ့လက်ထောက်တို့ နှစ်ယောက်စလုံး ရာထူးမှ နုတ်ထွက်လိုက်ကြသည်။ ကော့စ်သည် တရားရေးဌာနသို့ တရားရုံးရှေ့နေချုပ် ရောဘတ်ဘော့ ရောက်လာမှ နုတ်ထွက်သွားခဲ့သည်။

ထိုသို့ တင်စီးသော အာဏာပြမှုများဖြင့် ချုပ်ကိုင်ဆောင်ရွက်နေမှုသည် တစ်နိုင်ငံလုံးသို့ သတင်းပြန့်သွားတော့သည်။ စာနှင့် ကြေးနန်းပေါင်း သန်းနှင့်ချီကာ ဝါရှင်တန်သို့ ရောက်လာပြီး ကန့်ကွက်ရှုတ်ချကြသည်။ ကွန်ဂရက်လွှတ်တော်ကလည်း ပြစ်တင် ဝေဖန် ကန့်ကွက်ခဲ့ကြသည်။ အောက်တိုဘာ ၁၀ ရက်နေ့တွင် ဒု-သမ္မတ စပီရို အက်နယူးသည် အင်ဂျင်နီယာ ကန်ထရိုက်တာများထံမှ ၁၉၆၀ နှစ်ပိုင်းလောက်က ဘောလ်တီမိုး၌ တာဝန်ထမ်းဆောင်စဉ် လာဘ်ငွေ ဒေါ်လာသန်းနှင့်ချီ ယူကာ စားထားသည်ဆိုသော စွပ်စွဲချက်ကို ငြင်းလည်း မငြင်း၊ ဝန်လည်း မခံဘဲ တာဝန်မှ နုတ်ထွက်သွားခဲ့ပြန်သည်။ သူ့နေရာတွင် နစ်ဆင်က သူ့အတွက် စိတ်ချရမည့် ခပ်နုံအအ ဂျရယ် ဖို့ဒ်ကို ခန့်အပ်လိုက်သည်။

တင်ညွှန့် ရေးသားသော ကမ္ဘာကျော်နိုင်ငံရေး အရှုပ်တော်ပုံများ စာအုပ်မှ ကူးယူဖော်ပြသည်။

ရသ

# Open More Online