ဆိုကရေးတီး ၏ နည်းကောင်းတစ်လက် (အပိုင်း – ၁)
လူများနှင့် စကားပြောရန် ရှိသောအခါ သင်နှင့် ထိုလူများ သဘောမတူနိုင်သော အကြောင်းကစ၍ မပြောလေနှင့်။ သင်နှင့်ထိုလူများ သဘောတူနိုင်အောင် အကြောင်းများကို အထူးဂရုပြု၍ စပါလေ။ သင်နှင့် သဘောကွဲနေသောအခါ သင်၏ယူဆပုံမှာလည်း နောက်ဆုံးတွင် ထိုလူများ ယူဆသည့်နေရာသို့ ရောက်မည်ဖြစ်၍ ယူဆချက်အပေါ်တွင် သဘောမကွဲလွဲဘဲ ထိုယူဆချက်သို့ရောက်အောင် လာရသည့်နည်းပေါ်မှာသာလျှင် သဘောကွဲလွဲခြင်း ဖြစ်ကြောင်းကိုလည်း သင် တတ်နိုင်ခဲ့ပါလျှင် အထူးဂရုပြု၍ ပြောပါလေ။
စကတည်းက တစ်ဖက်သားကို ‘အင်း အင်း’ ဟူ၍ အင်းလိုက်နေအောင် လုပ်ပါ။ ‘ဟင့်အင်း’ ဟူသော စကားကို သုံးခွင့်မရအောင် သင်တတ်နိုင်သမျှ ကြိုးစားပါ။ ‘ဟင့်အင်း’ ဟူသော စကားတစ်လုံးသည် ပြောမိလျှင် ပြန်၍ရုပ်သိမ်းရန် အလွန်ခဲယဉ်းသော အခက်အခဲတစ်ခု ဖြစ်လေသည်။ လူတစ်ယောက်သည် ‘ဟင့်အင်း’ ဟု ဆိုမိလျှင် သူ၏ဂုဏ်သိက္ခာကို စောင့်သိသော သဘောရသဖြင့် ပြောပြီးသောစကားကို နောက်ထပ် မပြင်တော့ချေ။ ပြောမိ၍ အတော်ကလေးကြာသောအခါ ‘ဟင့်အင်း’ ဆိုသော စကားကို သုံးမိသည့်အတွက် မှားကြောင်းကို သိရှိသော်လည်း သူ၏ ဂုဏ်သိက္ခာကို ငဲ့ညှာစရာရှိသေးသဖြင့် ထပ်၍မပြင်ချေ။ ပြောမိသောစကားကို ဇွတ်တွယ်၍ ထားမည်ဖြစ်၏။ ထို့ကြောင့် လူတစ်ဦးတစ်ယောက်နှင့် စကားပြောသောအခါ သူ သဘောတူနိုင်သည့်အကြောင်းမှစ၍ပြောရန် အရေးကြီးဆုံး ဖြစ်လေသည်ဟူ၍ ပရော်ဖက်ဆာ အိုဗာစထရီသည် ‘တစ်ဖက်သားအပေါ် သြဇာညောင်းအောင်လုပ်နည်း’ စာအုပ်တစ်အုပ်တွင် အတိအလင်း ရေးသားထားလေသည်။
စကားပြော ကျင်လည်သူတစ်ဦးသည် တစ်ဖက်သားအား ‘အင်း အင်း’ ဟူ၍ အင်းလိုက်စေမည့် စကားမျိုးကို စ၍ ပြောလေ့ရှိသည်။ ဤနည်းအားဖြင့် တစ်ဖက်သား၏ စိတ်ဓာတ်ကို သူပြောသမျှတွင် အင်းလိုက်ချအောင် ပျိုးပေးလိုက်လေသည်။ အင်းလိုက်အောင် လုပ်သောနည်းကို အသုံးပြုမိသဖြင့် နယူးယော့မြို့တော် ဂရင်းနစ်ငွေစုဘဏ်တိုက်မှ ငွေကိုင်စာရေးကြီး ဂျိမ်း အီဗာဆန် သည် ငွေစုမည့်သူတစ်ဦးကို လက်လွတ်၍ မသွားအောင် တားထားလိုက်နိုင်လေသည်။ ထိုနည်းကိုသာ မသုံးမိလျှင် ထိုသူသည် ဂျိမ်း အီဗာဆန်တို့ဘဏ်တိုက်တွင် ငွေစုဖြစ်ချင်မှ စုဖြစ်လိမ့်မည်။
ဂျိမ်း အီဗာဆန်က အောက်ပါအတိုင်း ပြောပြဖူး၏။ တစ်နေ့တွင် ကျွန်ုပ်တို့ဘဏ်တိုက်သို့ လူတစ်ယောက်သည် ငွေစုရန်လာ၏။ ကျွန်ုပ်သည် ထိုသူ့အား ဆိုင်ရာစာရွက်စာတမ်းများကို ပေး၍ လိုအပ်သောအချက်များကို ရေးစေလေသည်။ ထုံးစံအတိုင်း မေးခွန်းများကိုမေးရာ အချို့မေးခွန်းများကိုသာ ဖြေပြီးလျှင် အခြားမေးခွန်းများကိုမူကား မည်သည့်နည်းနှင့်မျှ မဖြေနိုင်ဟူ၍ အတိအလင်း ငြင်းပယ်လျက်ရှိသည်။
လူများနှင့် ပေါင်းသင်းဆက်ဆံသည့် နည်းများကို မလေ့လာဖူးခင်ကသာဆိုလျှင် ‘ကျုပ်မေးတာကို ခင်ဗျား မဖြေရင် ခင်ဗျားကို ဒီဘဏ်မှာ ငွေစုဖို့ ကျုပ်တို့လက်မခံနိုင်ဘူး’ ဟု တုံးတိတိ ပြောလိုက်မည်ဖြစ်၏။ ဒီလိုအပြောမျိုးကို ရှေးအခါတုန်းက ပြောခဲ့ဖူးကြောင်း ကျွနု်ပ်သည် ရှက်ရှက်နှင့် ဝန်ခံရမည်ဖြစ်၏။ ဒီလိုပြောလိုက်ရလျှင် ရှေးအခါတုန်းက ကျွနု်ပ်မှာ အတော်အရသာရှိသွား၏။ ဘဏ်တိုက်မှာ ဘယ်သူဗိုလ်ဖြစ်သည်ကို ပြလိုက်ရုံသာမက ‘ဘဏ်တိုက်၏ စည်းကမ်းဥပဒေကိုု ဖျက်ဆီးချင်လို့ မရဘူး’ ဟူ၍ ခပ်မာမာလည်း ပြောလိုက်သေး၏။ သို့ရာတွင် ကျွန်ုပ်တို့၏အကျိုးကို ဆောင်ရွက်ရန်အတွက် ကျွန်ုပ်တို့ဆီသို့ ဝင်လာသောလူမှာမူကား ဤကဲ့သို့ အပြောမျိုးကို မည်သည့်နည်းနှင့်မျှ နှစ်ခြိုက်နိုင်မည်မဟုတ်ပေ။
‘ထို့ကြောင့် ထိုနေ့တွင် ဉာဏ်ကိုလွှာသုံးရန် သန္နိဋ္ဌာန်ချထား၏။ ဘဏ်တိုက်က ဘာကိုအလိုရှိသည် ဟူသော အကြောင်းကို မပြောပြဘဲ ထိုလူသည် ဘာကိုအလိုရှိသည် ဟူသော အကြောင်းကိုသာ ပြောပြရန်ကိုလည်း သန္နိဋ္ဌာန်ချထား၏။ ထိုနှစ်ခုထက် အရေးကြီးသောအချက်မှာကား အခြားမဟုတ်။ ထိုလူကို အင်းလိုက်နေအောင် စကားစပြောရန် သန္နိဋ္ဌာန်ချထားခြင်းပင် ဖြစ်လေသည်။ ထို့ကြောင့် ထိုသူသည် ကျွန်ုပ်မေးသော မေးခွန်းကို မဖြေဘူးဟူ၍ ငြင်းနေသောအခါ ဖြေရမည်ဟူ၍ အတင်းအကျပ် မတိုက်တွန်းရုံသာမက ထိုအချက်ကို မဖြေသော်လည်း နေနိုင်ပါသည်’ ဟု ပြန်ပြောလိုက်၏။
ထို့နောက်မှ ‘သို့ပေမဲ့ ဒီလိုရှိတယ် အဆွေ၊ ဒီဘဏ်မှာ ငွေတွေစုထားပြီး အဆွေ အနိစ္စရောက်တယ် ဆိုပါတော့၊ အဲဒီအခါမှာ ဒီငွေကို အဆွေနဲ့အရင်းနှီးဆုံးဖြစ်တဲ့ ဆွေမျိုးသားချင်းရဲ့လက်ထဲရှိ တရားဥပဒေအတိုင်း ရောက်စေချင်မယ် မဟုတ်လား’ ဟု ကျွန်ုပ်က မေးလိုက်ရာ ‘အင်း ရောက်စေချင်တာပေါ့’ ဟူ၍ ထိုသူက ပြန်ပြောလေသည်။ ‘အဲဒီတော့ အဆွေအနိစ္စရောက်တဲ့အခါ ကျွန်တော်တို့တစ်တွေ အမှားအယွင်း နှောင့်နှေးကြန့်ကြာခြင်းမရှိဘဲနှင့် အဆွေ၏ အရင်းအချာ ဆွေမျိုး၏နာမည်ကို ကျွန်တော်တို့ သိထားရင် ကောင်းလိမ့်မယ်လို့ အဆွေမထင်ဘူးလား’
‘အင်း’ ကျွန်ုပ်တို့သည် ဤကဲ့သို့ မေးရခြင်းမှာ ကျွန်ုပ်တို့၏ အကျိုးအတွက်မဟုတ်ဘဲ သူ၏အကျိုးအတွက် သက်သက်ဖြစ်ကြောင်းကို ထိုသူသိလာသောအခါ သူ၏လေသံမှာ ဝင်လာစကလောက် မထန်တော့ပေ။ ထို့ကြောင့် ဘဏ်တိုက်မှ ထွက်မသွားမီ ထိုလူသည် ကျွန်ုပ်တို့သိလိုသည့်အကြောင်းမျိုးစုံကို ဖြေရုံသာမက သူ့မိခင်၏အကြောင်းကိုပါ ကျွန်ုပ်အား ပြောသွားခဲ့သေး၏။ သူ့ကို အင်းလိုက်အောင် လုပ်လိုက်သဖြင့် သူသည် သူ၏ ငြင်းဆန်ခြင်းကိုပင် သတိမေ့ပြီးလျှင် ကျွန်ုပ်တို့ ပြောရာကိုလိုက်၍ လုပ်ချင်သောဆန္ဒများ ပေါ်လာသည်ကို ကျွန်ုပ်ကောင်းစွာ တွေ့လိုက်ရ၏။
ဆိုကရေးတီး ၏ နည်းကောင်းတစ်လက်
