ဦးနှောက်ပျက်စီးစေနိုင်သည့်

ဦးနှောက်ပျက်စီးစေနိုင်သည့် နေ့စဉ်အမူအကျင့်များ

ဦးနှောက်ပျက်စီးစေနိုင်သည့် နေ့စဉ်အမူအကျင့်များ

သင့်ရဲ့ ဦးနှောက်က ခန္ဓာကိုယ်တွင်းက အရာအားလုံးကို အခြေခံကစပြီး ထိန်းချုပ်ထားဖို့အတွက် ဆဲလ်သန်းပေါင်းတစ်သိန်းကျော်နဲ့ ဖွဲ့စည်းထားပါတယ်။ ကျွန်မတို့အများစုဟာ နေ့စဉ် ယဉ်ပါးနေတဲ့အမူအကျင့်တွေကို အကျင့်ပါပြီး ပြုလုပ်လေ့ရှိပါတယ်။ ဒီအမူအကျင့်တွေထဲက တချို့တလေဟာ ဦးနှောက်ကို ပျက်စီးစေနိုင်တယ်ဆိုတာသိကြမှာ မဟုတ်ပါဘူး။ ဒါပေမဲ့ မပူပါနဲ့။ အဲဒီ အမူအကျင့်တွေကို အလွယ်တကူ ပြုပြင်နိုင်ခဲ့ရင် သင့်ဦးနှောက်ကို အချိန်မီ ကယ်တင်နိုင်မှာပါ။ ဒါကြောင့် ဦးနှောက်ပျက်စီးစေနိုင်တဲ့ အမူအကျင့်တွေမို့ ရှောင်ကြဉ်နိုင်ဖို့ ဖော်ပြပေးလိုက်ပါတယ်။

စကားနည်းခြင်း
မီချီဂန်တက္ကသိုလ်ရဲ့ လေ့လာမှုအရ တစ်နေ့ကို ၁၀ မိနစ်လောက် စကားပြောနေရင်တောင် ဦးနှောက်စွမ်းအားတိုးတက်လာတယ်လို့ သိရပါတယ်။ သင် တွေ့ကရာလူနဲ့ စကားပြောနေဖို့ ဆိုလိုတာ မဟုတ်ပါဘူး။ သင်က အလုပ်မလုပ်ဘဲ အိမ်မှာဘဲ နေရသူဖြစ်နေရင် သင့်သူငယ်ချင်း ဒါမှမဟုတ် ဆွေမျိုးတွေနဲ့ ဖုန်းပြောပါ။ ခန္ဓာကိုယ်ကို အလေးမတဲ့အခါမှာ ကိုယ်တွင်းက ကြွက်သားတွေက သန်မာပြီး ကြီးထွားလာသလိုမျိုးပါပဲ။ စကားပြောတာက သင့်ဦးနှောက်ကို လေ့ကျင့်ခန်းပြုလုပ်ပေးသလို ဖြစ်သွားပါတယ်။ သင့်ရဲ့ အတွေးအမြင်တွေ၊ စိတ်ခံစားချက်တွေကို စကားအဖြစ် ပြောပြလိုက်တာက သင့်ဦးနှောက်သန်မာလာသလို သင့်အနေနဲ့လည်း စကားပြောစွမ်းရည်တွေ တိုးတက်လာမှာပါ။

သကြားအစားများခြင်း
သကြားအစားများလွန်းတာကြောင့် သွားပိုးပေါက်ဖြစ်တာ၊ အဝလွန်တာ၊ ဆီးချိုရောဂါဖြစ်တာတွေအပြင် ဦးနှောက်ပျက်စီးတာတွေပါ ဖြစ်လာနိုင်ပါတယ်။ ခန္ဓာကိုယ်တွင်းမှာ သကြားများလွန်းတာကြောင့် သင်စားတဲ့အစားအစာရဲ့ အာဟာရတွေကို စုပ်ယူမှုမှာ အနှောင့်အယှက်ဖြစ်သွားပြီး အာဟာရချို့တဲ့တဲ့လက္ခဏာတွေ ဖြစ်လာနိုင်ပါတယ်။ ဒါ့အပြင် လေ့လာမှုအများအပြားအရ သကြားအများကြီးစားသုံးတာက အာရုံခံဆဲလ်တွေ ထုတ်လုပ်မှုကို တာဝန်ယူတဲ့ နျူရိုထရက်ဖစ်ဖက်တာမှာ ဆိုးကျိုးတွေ ဖြစ်ပေါ်လာနိုင်ပါတယ်။ ဒီဖက်တာက ရေရှည်မှတ်ဉာဏ်နဲ့ သင်ကြားမှုအပိုင်းအတွက် အလွန်အရေးကြီးပါတယ်။

ဦးနှောက်လေ့ကျင့်ခန်း မပြုလုပ်ခြင်း
သိပ္ပံပညာရှင်တွေရဲ့ အဆိုအရ ဦးနှောက်လုပ်ငန်းဆောင်တာက အသက် ၁၆-၂၅ နှစ်ကြားအချိန်က အကောင်းဆုံးဖြစ်ပြီး နောက်ပိုင်းမှာ တဖြည်းဖြည်းကျဆင်းသွားတယ်လို့ သိရပါတယ်။ ဆက်လက်ပြီး သုတေသနပြုလုပ်ချက်အရ စာဖတ်တာ၊ Puzzle ဂိမ်းလိုမျိုး ဦးနှောက်လေ့ကျင့်ခန်းတွေကို ပုံမှန်ပြုလုပ်တာကြောင့် ဦးနှောက်ရဲ့ လုပ်ငန်းဆောင်တာတွေ ပိုမိုကောင်းမွန်လာတယ်လို့ သိရပါတယ်။ ဒီလေ့ကျင့်ခန်းတွေကြောင့် သူငယ်ပြန်လက္ခဏာ ဖြစ်ခါစသူတွေမှာတောင်မှ ဦးနှောက်လုပ်ငန်းဆောင်တာတွေ ပြန်လည် သန်မာနိုင်တယ်လို့ ဆိုပါတယ်။

နံနက်စာ မစားခြင်း
လေ့လာမှုအများအပြားအရ ပုံမှန် မနက်စာစားတဲ့ကလေးတွေက ကျောင်းမှာ လုပ်ဆောင်ချက်တွေ (အထူးသဖြင့် သိပ္ပံဘာသာရပ်) ပိုမိုကောင်းမွန်တယ်လို့ သိရပါတယ်။ မနက်စာမစားဘဲနေတာကြောင့် သွေးတွင်းသကြားဓာတ်တွေ ကျဆင်းလာပြီး ဦးနှောက်လုပ်ငန်းဆောင်တာပေါ်မှာ ဆိုးကျိုးသက်ရောက်နိုင်ပါတယ်။ ဂျပန်က လူပေါင်း ရှစ်သောင်းကျော်ကို ၁၅ နှစ်တာလေ့လာမှုအရလည်း မနက်စာကို ပုံမှန်မစားသုံးသူတွေအနေနဲ့ သွေးတိုးရောဂါနဲ့ သွေးပေါင်ချိန်ကျဆင်းသွားတတ်တာကြောင့် ဦးနှောက်အတွင်း သွေးယိုစီးနိုင်ခြေလျော့ကျသွားတာကြောင့်လို့ ဆိုပါတယ်။

အဆင်သင့်စာ စားသုံးခြင်း
အဆင်သင့်စာတွေ စားသုံးလွန်းရင်လည်း ရေတိုနဲ့ ရေရှည်မှတ်ဉာဏ်တွေ ကျဆင်းသွားနိုင်တယ်လို့ သိရပါတယ်။ ဒါအပြင် စိတ်ကျဝေဒနာလည်း ဖြစ်လာနိုင်ပါတယ်။ အဆင်သင့်စာတွေမှာ ကယ်လိုရီတွေများစွာ ပါဝင်တဲ့အတွက် မှတ်ဉာဏ်ကျဆင်းပြီး အယ်လ်ဇိုင်းမားရောဂါတောင် ဖြစ်နိုင်ခြေများတယ်လို့ လေ့လာသူတွေက ဆိုပါတယ်။

ဆဲလ်ဖုန်း အသုံးပြုခြင်း
ကြွက်တွေပေါ်မှာ ပြုလုပ်တဲ့လေ့လာမှုအရ ဆဲလ်ဖုန်းအသုံးပြုတာနဲ့ ဦးနှောက်ကင်ဆာဖြစ်တာ ဆက်စပ်မှုရှိတယ်လို့ သိရပါတယ်။ ဆဲလ်ဖုန်းကို အသုံးပြုချင်တယ်ဆိုရင် နားကြပ်သုံးပြီး ပြောပါ။ ဒါမှမဟုတ် စပီကာဖွင့်ပြီး ပြောပါ။ သင် အိပ်နေစဉ်မှာ ဖုန်းကို သင့်ခေါင်းအုံးနားထားမအိပ်ပါနဲ့။

ခေါင်းမြီးခြုံ အိပ်ခြင်း
ခေါင်းမြီးခြုံပြီး အိပ်တာကြောင့် သင့်ခန္ဓာကိုယ်အတွင်း အောက်ဆီဂျင်ရရှိမှုနည်းသွားပါလိမ့်မယ်။ အောက်ဆီဂျင်က ဦးနှောက်လုပ်ငန်းဆောင်တာအတွက် အလွန်အရေးကြီးပါတယ်။ ခေါင်းမြီးခြုံပြီး အိပ်တာ ဒါမှမဟုတ် ခေါင်းစွပ်စွပ်အိပ်တာက ကိုယ်တွင်းအောက်ဆီဂျင်ရရှိမှုဟာ ၂၁ ရာခိုင်နှုန်းအထိ လျော့နည်းသွားနိုင်ပါတယ်။

ရေလုံလုံလောက်လောက် မသောက်ခြင်း
ကျွန်မတို့ဦးနှောက်မှာ ရေဓာတ်က ၇၀-၈၀ ရာခိုင်နှုန်းအထိ ပါဝင်ပါတယ်။ ရေလုံလုံလောက်လောက်မရရှိတာ ကြာလာတဲ့အခါ ဦးနှောက်က ကျုံ့သွားတဲ့အတွက် စီမံချက်ချပြီး ပြုလုပ်ရမယ့်အရာတွေကို စွမ်းဆောင်နိုင်မှာ မဟုတ်တော့ပါဘူး။

အရက်သောက်ခြင်း
လေ့လာမှုအများအပြားအရ အရက်သောက်လွန်းတာက ဦးနှောက်ဆဲလ်တစ်ခုနဲ့တစ်ခုကြား ဆက်သွယ်မှုကို ဖျက်ဆီးနိုင်တယ်လို့ သိရပါတယ်။ အရက်ဖြတ်လိုက်တာနဲ့ ဦးနှောက်လုပ်ငန်းဆောင်တာက ပုံမှန်အတိုင်း ပြန်ကောင်းသွားနိုင်တယ်လို့ ဆိုပါတယ်။
လန်ဒန် အောက်စဖို့ဒ်တက္ကသိုလ်မှ သုတေသီတွေက လူကြီးပေါင်း ၅၀၀ ကျော်ကို နှစ်ပေါင်း ၃၀ ကျော် လေ့လာမှုပြုလုပ်ရာမှာ တစ်ပတ်ကို အရက် ၁၅-၂၀ ယူနစ်သောက်သုံးသူတွေက မှတ်ဉာဏ်နဲ့ ပက်သက်တဲ့ ဦးနှောက်အစိတ်အပိုင်းမှာ ကျုံ့သွားတယ်လို့ တွေ့ရှိခဲ့ပါတယ်။

ဆေးလိပ်သောက်ခြင်း
ဆေးလိပ်သောက်တာကြောင့် ကင်ဆာရောဂါတစ်မျိုးတည်းဖြစ်တာ မဟုတ်ပါဘူး။ ဦးနှောက်ပါ ကျုံ့သွားနိုင်ပြီး အယ်လ်ဇိုင်းမားရောဂါ ရရှိနိုင်ပါတယ်။

တီဗီကြည့်ချိန် များလွန်းခြင်း
တီဗီက ဦးနှောက်အတွက် Junk Food လို ဖြစ်နေပါတယ်။ Junk Food စားတာကြောင့် သွားပိုးပေါက်ဖြစ်သလိုမျိုးပါပဲ။ ဂျပန်က အာရုံကြောသိပ္ပံပညာရှင်တွေရဲ့ လေ့လာမှုအရ တီဗီကြည့်ချိန်ကြာလွန်းတာကြောင့် ကလေးတွေရဲ့ ဦးနှောက်တည်ဆောက်ပုံတွေ ပြောင်းလဲသွားပြီး ပိုမိုဒေါသထွက်လွယ်လာကြတယ်လို့ သိရပါတယ်။

ဖျားနေစဉ် အလုပ်လုပ်ခြင်း
သင်ဖျားနေစဉ်မှာ ပြန်လည်ကောင်းမွန်အောင် ခန္ဓာကိုယ်က စွမ်းအင်တွေ အများကြီးအသုံးပြုရပါတယ်။ ဒီအချိန်မှာ ဦးနှောက်ကို အလုပ်လုပ်ခိုင်းမယ်ဆိုရင် ခုခံအားစနစ်တွေ လျော့ကျသွားပြီး အလွယ်တကူ အဖျားရောဂါဝင်တာနဲ့ စဉ်းစားတွေးခေါ်နိုင်စွမ်း မရှိတော့တာမျိုးတွေ ဖြစ်လာနိုင်ပါတယ်။

တစ်ချိန်တည်းတွင် အလုပ်မျိုးစုံလုပ်ခြင်း
လန်ဒန်တက္ကသိုလ်မှ လေ့လာမှုအရ တစ်ချိန်တည်းမှာ အလုပ်မျိုးစုံလုပ်တာက IQ score ဟာ ယာယီအားဖြင့် ၁၅ ရာခိုင်နှုန်းအထိ ကျဆင်းတယ်လို့ သိရပြီး တချို့လေ့လာမှုအရ ထာဝရဦးနှောက်ပျက်စီးနိုင်ခြေ မြင့်မားတယ်လို့လည်း သိရပါတယ်။ တစ်ချိန်တည်း အလုပ်မျိုးစုံလုပ်သူတွေရဲ့ ဦးနှောက် အရှေ့ပိုင်း (စိတ်ခံစားချက်ကို ထိန်းချုပ်ပေးတဲ့နေရာ) မှာ သိပ်သည်းမှုတွေ ကျဆင်းသွားတယ်လို့ သုတေသီတွေက တွေ့ရှိခဲ့ပါတယ်။

အရာရာကို ဦးနှောက်မသုံးဘဲ Google ၌သာရှာဖွေခြင်း
အရင်တုန်းကတော့ ဖုန်းနံပါတ်တွေကို အလွတ်မှတ်တဲ့ အကျင့်ရှိခဲ့ကြမှာပါ။ အခုနောက်ပိုင်းမှာတော့ အရာရာကို Google အသုံးပြုပြီးတော့ပဲ ရှာဖွေတာ၊ ဖုန်းနံပါတ်တွေကို ဖုန်းထဲမှာပဲ ထည့်သိမ်းဆည်းတာမျိုးတွေ ပြုလုပ်လာတာကြောင့် ဦးနှောက်အသုံးပြုမှု နည်းသွားကြပါပြီ။ ဒီလိုအသုံးမပြုတာ များတာကြောင့် ဦးနှောက်ပျက်စီးလာနိုင်ပါတယ်။

အိပ်ရေးမဝခြင်း
အိပ်ရေးဝတာက ကျန်းမာရေးအတွက် ဘက်ပေါင်းစုံကနေ အထောက်အပံ့ပေးနိုင်ပါတယ်။ လေ့လာမှုအများအပြားအရ လူအများစုဟာ ညစဉ် အိပ်ချိန်ခုနှစ်နာရီထက် လျော့နည်းနေကြတယ်လို့ သိရပါတယ်။ မကြာခင်က ပြုလုပ်တဲ့ လေ့လာမှုအရ အိပ်ရေးမဝတာကြောင့် ဦးနှောက်ဆဲလ်တွေ သေဆုံးသွားနိုင်တယ်လို့ သိရပါတယ်။

မှတ်ဉာဏ်ထက်သန်စေမည့် ဦးနှောက်လေ့ကျင့်ခန်းများ
သင်က အိမ်ပြင်ထွက်မှာမို့လို့ အိမ်တံခါးပိတ်ပြီးတော့မှ အိမ်ထဲမှာ ဖုန်းကျန်ရစ်ခဲ့တာလိုမျိုးတွေ ဖြစ်နေပါသလား။ ဒီလိုမျိုး မေ့တတ်တာတွေက အသက်အရွယ်ကြီးရင့်တာရဲ့ အစိတ်အပိုင်းတစ်ခုတည်းကြောင့် မဟုတ်ပါဘူး။ သင့်အနေနဲ့ မကြာခဏ မေ့တတ်ရင် မှတ်ဉာဏ်ထက်သန်စေဖို့ ဖော်ပြပါ ဦးနှောက်လေ့ကျင့်ခန်းတွေ ပြုလုပ်သင့်နေပါပြီ။

နေ့စဉ် လုပ်ငန်းဆောင်တာတွေအတွက် လက်နှစ်ဖက်လုံးကို အသုံးပြုပေးပါ
ပုံမှန်အားဖြင့် ညာသန်သူတွေက တစ်နေ့တာလုံးအတွက် ညာဘက်လက်ကို အသုံးပြုကြပြီး ဘယ်သန်သူတွေက ဘယ်ဘက်လက်ကိုသာ အသုံးပြုလေ့ရှိကြပါတယ်။ တစ်ခါတစ်လေ လက်ကို ဘက်ပြောင်းပြီး အသုံးပြုတာက ဦးနှောက်အတွင်းမှာရှိတဲ့ အာရုံကြောဆက်နွယ်မှုတွေ သန်မာလာနိုင်ပါတယ်။ သွားတိုက်တာ၊ ပန်းကန်ဆေးတာ၊ စာရေးတာ၊ ဖန်ခွက်ထဲ ရေထည့်တာလိုမျိုးတွေမှာ မသန်တဲ့ဘက်အခြမ်းကို အသုံးပြုပေးပါ။ ပထမပိုင်းမှာတော့ အခက်အခဲရှိနိုင်ပေမယ့် အသုံးပြုဖန်များလာရင် ကျင့်သားရသွားပါလိမ့်မယ်။

အသံကျယ်ကျယ်ဖြင့် စာအော်ဖတ်ပါ
အသံကျယ်ကျယ်နဲ့ စာအော်ဖတ်တာက မှတ်ဉာဏ်ထက်သန်စေနိုင်ပါတယ်။ ပြောလည်းပြော၊ ကြားလည်းကြားဖြစ်နေတဲ့အတွက် ဦးနှောက်က အချက်အလက်တွေကို စုဆောင်းဖို့ အထောက်အကူရသွားပါတယ်။ သင့် သူငယ်ချင်းတွေ ဒါမှမဟုတ် သင့်ကလေးတွေနဲ့အတူ တွဲဖက်ပြီး စာဖတ်တာတွေ ပြုလုပ်ပါ။

ထမင်းစားတူကို အသုံးပြုပြီး အစာစားပါ
လက်ချောင်းထိပ်မှာရှိတဲ့ အာရုံကြောတွေကို အလုပ်လုပ်စေတာက ဦးနှောက်ကို လှုံ့ဆော်မှုပေးနိုင်ပါတယ်။ တူနဲ့ အစာစားတာက ဦးနှောက်အတွင်း သွေးလှည့်ပတ်မှုတွေ ပိုမိုကောင်းမွန်နိုင်ပါတယ်။ ဒါ့အပြင် အစာပေါ်မှာသာ အာရုံစိုက်နေရတဲ့အတွက် အစာခြေစနစ်ကောင်းမွန်တဲ့အပြင် ကယ်လိုရီရရှိမှုကိုလည်း ထိန်းချုပ်နိုင်ပါတယ်။

နံနက်အိပ်ရာထတွင် နှင်းဆီပန်းရနံ့ကို ရှူရှိုက်ပါ
သင့်အနေနဲ့ မနက်အိပ်ရာထခါစမှာ ကော်ဖီအနံ့လေးနဲ့ ကော်ဖီသောက်နေပါသလား။ ကော်ဖီရနံ့ကို ရှူမယ့်အစား နှင်းဆီရနံ့ကို ခံယူပြီး သင့်ရဲ့ လုပ်ဆောင်ချက်ကို ပြောင်းလဲလိုက်ပါ။ ဒီလိုပြုလုပ်တာကြောင့် အာရုံကြောဆက်သွယ်မှု လမ်းကြောင်းအသစ်တွေ ရရှိနိုင်ပါတယ်။ မနက်အိပ်ရာထခါစမှာ သင်ကြိုက်နှစ်သက်တဲ့ရနံ့ကို တစ်ပတ်စာလုံးအသုံးပြုသွားပါ။ နောက်တစ်ပတ်မှာ နောက်ရနံ့တစ်မျိုး ပြောင်းလဲလိုက်ပါ။

လက်သီးဆုပ်ပါ
အမေရိကန်စိတ်ကျန်းမာရေးအထူးကုအဖွဲ့က ညာဘက်လက်ကို စက္ကန့် ၉၀ ခန့် လက်သီးဆုပ်ထားရင် မှတ်ဉာဏ်အချက်အလက်တွေအတွက် အကူအညီရရှိပြီး ဘယ်ဘက်လက်ကို စက္ကန့် ၉၀ ခန့် လက်သီးဆုပ်ထားရင် ပြန်လည်မှတ်မိနိုင်စွမ်း ပိုမိုကောင်းမွန်တယ်လို့ မှတ်ချက်ပြုထားပါတယ်။

သင့်နှလုံးခုန်းနှုန်းကို တစ်ပတ် သုံးကြိမ် မြှင့်တင်ပေးပါ
နှလုံးခုန်နှုန်းကို တစ်ပတ် သုံးကြိမ် တစ်ကြိမ်ကို မိနစ် ၂၀ ခန့် မြင့်တက်အောင် လေ့ကျင့်ပေးပါ။ လမ်းလျှောက်တာနဲ့ နှလုံးခုန်းနှုန်းမြင့်တက်အောင် ပြုလုပ်နိုင်ပါတယ်။ နှလုံးခုန်းနှုန်းမြင့်တက်တာကြောင့် ဦးနှောက်အတွင်း အောက်ဆီဂျင်တွေပြည့်ဝလာပြီး ဆဲလ်အသစ်တွေ ဖြစ်ပေါ်ဖို့ ကူညီနိုင်ပါတယ်။

Puzzle သို့မဟုတ် ဆူဒိုခု ကစားပေးပါ
ဒီလိုကစားတာက သင့်ရဲ့ ဦးနှောက်ထဲမှာ စာလုံးပေါင်းတွေကို မြင်ယောင်နေပြီး အလွယ်တကူ မှတ်မိသွားနိုင်ကာ ဦးနှောက်ရဲ့ မှတ်ဉာဏ်ထက်သန်လာနိုင်ပါတယ်။

ကားမောင်းစဉ် ပြတင်းပေါက်ဖွင့်ထားပါ
ရာသီဥတုသာယာတဲ့အချိန်မှာ ပြတင်းပေါက်ဖွင့်ပြီး ကားမောင်းပေးပါ။ မြေသင်းရနံ့တွေရှူရှိုက်ပြီး ငှက်အော်သံလေးတွေ နားထောင်ပါ။ အဲဒီအခါမှာ အမြင်၊ အကြားနဲ့ အနံ့တွေရဲ့ ဆက်နွယ်မှုအတွက် ဦးနှောက်က ချက်ချင်းအလုပ်လုပ်သွားပါလိမ့်မယ်။

အသေးစိတ်လေ့လာစူးစမ်းသော လေ့ကျင့်ခန်းပြုလုပ်ပါ
လူများတဲ့ပတ်ဝန်းကျင်ထဲ ရောက်သွားတဲ့အခါမှာ သင် မျက်စိကျမယ့်လူတစ်ယောက်ရဲ့ အချက်အလက်လေးငါးမျိုးလောက်ကို အသေးစိတ်လေ့လာစူးစမ်းပါ။ ဥပမာအားဖြင့် ဆံပင်အရောင်၊ ဝတ်ထားတဲ့အင်္ကျီအမျိုးအစား၊ စီးထားတဲ့ဖိနပ်၊ အသုံးပြုထားတဲ့ပိုက်ဆံအိတ် ဒါမှမဟုတ် ရေမွှေးနံ့ကို စူးစမ်းပြီး ပြန်မှတ်မိသလားဆိုတာ ဆန်းစစ်ပါ။ ဒီလိုလေ့ကျင့်တာက သင့်ရဲ့ မှတ်ဉာဏ်တွေကို ထက်သန်လာပါလိမ့်မယ်။

ဒေါက်တာ ခင်မိုးမိုး ရေးသားထားသော သင့်ကျန်းမာရေး ရှောင်ရန် အမူအကျင့်များ(DON’Ts FOR YOUR HEALTH) စာအုပ်မှ ကူးယူ ဖော်ပြသည်။

Related Posts