65

တွေ့လျှင် တွေ့ချင်း သဘောကျစေရန်နည်း (အပိုင်း – ၄)

တွေ့လျှင် တွေ့ချင်း သဘောကျစေရန်နည်း (အပိုင်း – ၄) ~~~~
သို့ဖြင့် နောက်ဆုံးတွင် အိစမန်းသည် အက်ဒမ်ဆန်ဘက်သို့လှည့်၍ ‘အရင်တစ်ခေါက်က ဂျပန်ပြည်ကို ကျွန်တော်ရောက်ခဲ့တုန်းက ကုလားထိုင် ၄-၅ လုံးလောက် ဝယ်ခဲ့ပြီး ကျွန်တော့်အိမ်ရဲ့ အိမ်ရှေ့ခန်းမှာ ထားတယ်၊ နေပူလို့ထင်ပါရဲ့ ဆေးတွေကွာကုန်တာနဲ့ မနေ့က မြို့ကို ရောင်တင်ဆီတစ်ပုလင်း သွားဝယ်ပြီး ကျွန်တော့်ဟာကျွန်တော် ဆေးသုတ်ထားလိုက်တယ်၊ ကျွန်တော် ဆေးဘယ်လောက်သုတ်တတ်တယ်ဆိုတာကို ခင်ဗျား ကြည့်မလား၊ ကဲ ကျွန်တော့်အိမ်မှာ နေ့လယ်စာ လိုက်ပြီး စားလှည့်ဗျာ၊ နေ့လယ်စာစာပြီးတော့ ကျွန်တော် ဆေးသုတ်ထားတဲ့ ကုလားထိုင်တွေကို ကြည့်ရအောင်’ ဟု ဆက်၍ ပြောလေသည်။

နေ့လယ်စာ စားသောက်ပြီးနောက် မစ္စတာ အိစမန်းသည် အက်ဒမ်ဆန်သို့ ဂျပန်ပြည်မှ သူဝယ်ယူလာသော ကုလားထိုင်များကို ပြလေသည်။ ထိုကုလားထိုင်များသည် တစ်လုံးလျှင် တစ်ဒေါ်လာခွဲလောက်ပင် မတန်ချေ။ သို့ရာတွင် ဒေါ်လာသန်းပေါင်းတစ်ရာကျော်မျှ ချမ်းသာသော မစ္စတာအိစမန်းသည် ထိုကုလားထိုင်များပေါ်တွင် ဂုဏ်ယူလျက် ရှိလေသည်။ အကြောင်းမူကား ထိုကုလားထိုင်များကို သူကိုယ်တိုင် ဆေးသုတ်သောကြောင့်ပင် ဖြစ်လေသည်။ မစ္စတာအိစမန်းသည် ဆောက်လုပ်သော အဆောက်အအုံနှစ်ခုအတွက် မှာယူသော ကုလားထိုင်ဖိုးသည် ဒေါ်လာငွေ ၉၀၀၀၀ မျှ ရှိလေသည်။ ထိုကုလားထိုင်များကို မည်သူ့ထံမှ ဝယ်ယူမည်ဟု သင် ထင်ပါသနည်း။

ထိုအချိန်မှစ၍ မစ္စတာအိစမန်း အနိစ္စရောက်သည့်နေ့တိုင်အောင် ထိုသူနှစ်ဦးသည် မိတ်ဆွေရင်းချာများ ဖြစ်ကြလေသည်။ တစ်ဖက်သားအား ဤကဲ့သို့ လှိုက်လှိုက်လှဲလှဲ ချီးမွမ်းသောနည်းကို သင်နှင့် ကျွန်ုပ်တို့သည် ဘယ်နေရာတွင် အသုံးပြုရမည်နည်း။ ထိုနည်းကို သင်နှင့် ကျွန်ုပ်တို့၏ အိမ်များတွင် အဘယ်ကြောင့် အသုံးမပြုရသေးသနည်း။ ထိုနည်းများကို အသုံးပြုရန် အိမ်ထက် ပို၍လိုအပ်သော နေရာသည် အခြားတွင် မရှိသော်လည်း သင်နှင့် ကျွန်ုပ်တို့သည် ထိုနည်းများကို အိမ်တွင် လျစ်လျူရှု၍ ထားတတ်ကြသည်။ သင်၏ ဇနီးသည်တွင် ကောင်းသောအရည်အချင်းအချို့ ရှိပေလိမ့်မည်။ ဤကဲ့သို့မှ မရှိပါလျှင် သင်သည် ထိုမိန်းမကို လက်ထပ်ခဲ့မည်မဟုတ်။ သို့ရာတွင် သင်၏ ဇနီးသည်ကို ဘယ်နှစ်ကြိမ်များ ချီးမွမ်းယုယဖူးပါသလဲ။ စဉ်းစားပြီး ဖြေစမ်းပါ။ ဘယ်နှစ်ကြိမ်များ ချီးမွမ်းယုယဖူးသလဲဆိုတာ။

လွန်ခဲ့သော နှစ်အနည်းငယ်ခန့်က နယူးဘရန်းစဝစ်နယ်ရှိ မီရာမီချိမြစ်ဖျားတွင် ငါးမျှားရန် ကျွန်ုပ် သွားခဲ့၏။ တစ်နေ့တွင် ကျွန်ုပ်တစ်ဦးတည်း အလွန်ပျင်းသောကြောင့် ဖတ်စရာလိုက်၍ရှာရာ နယ်သတင်းစာကလေး တစ်စောင်ကိုသာ တွေ့ရ၏။ ပျင်းပျင်းနှင့် ထိုသတင်းစာထဲရှိ စာများကို ကြော်ငြာမကျန် အကုန်လုံး လျှောက်ဖတ်ရာ ဒေါ်ရသီဒစ်၏ ဆောင်းပါးတစ်စောင်ကို တွေ့ရ၍ ထိုဆောင်းပါးသည် အလွန်အဖိုးတန်သောကြောင့် ကျွန်ုပ်သည် ဆုတ်ယူထားပါသည်။ သတို့သမီးများကိုသာ ပြောကြားလျက်ရှိသော ဆုံးမစကားတို့ကို အစဉ်သဖြင့် ကြားရ၍ နားငြီးလှပြီဖြစ်ရာ သတို့သားများကိုလည်း တစ်နေရာသို့ ခေါ်သွားပြီးလျှင် အောက်ပါဆုံးမစကားကလေးများကို ပြောပါဦးဟူ၍ ဒေါ်ရသီဒစ်က တိုက်တွန်းထား၏။

မိန်းမအကြောင်းကို နားမလည်ဘဲနှင့် မည်သည့်အခါမျှ လက်မထပ်ပါနှင့်။ လက်မထပ်မီ မိန်းမတစ်ဦးကို ချီးမွမ်းချင်သပဆိုလျှင် ချီးမွမ်းလိုသူ၏ သဘောပင် ဖြစ်၏။ သို့ရာတွင် လက်ထပ်ပြီးသောအခါ သင်၏ ဇနီးသည်ကို ချီးမွမ်းခြင်းသည် သင်၏ သာမန်ဝတ္တရားတစ်ရပ် ဖြစ်ရုံသာမက သင်၏ ကိုယ်ရေးအတွက် အရေးကြီးသော ဝတ္တရားတစ်ခုပင် ဖြစ်လေသည်။ လင်နှင့် မယား ဆက်ဆံရာတွင် ဝမ်းထဲရှိသမျှ ပြောထုတ်ချ၍ မရ။ လိုရင်းရောက်အောင် လှည့်ပတ်ပြောမှသာ ရလေသည်။

အကယ်၍ သင်သည် နေ့စဉ် ဟင်းကောင်းနှင့် ထမင်းစားချင်ပါလျှင် သင်၏ဇနီးသည် ချက်ပုံပြုတ်ပုံကို ဘယ်အခါမျှ အပြစ်မရှာပါနှင့်။ သင်၏ အမေ့အိမ်တွင် စားရစဉ်က ဘယ်လို၊ မိန်းမအိမ်ကျကာမှ ဘယ့်နှယ် စသည်ဖြင့် နှိုင်းယှဉ်၍လည်း ဘယ်အခါမျှ အပြစ်မဆိုပါနှင့်။ သို့ရာတွင် သင့်ဇနီးသည်၏ အိမ်တွင်းရေး စီမံအုပ်ချုပ်ရာတွင် စေ့စပ်လုံခြုံပုံကို အစဉ်သဖြင့် ချီးကျူးပါ။ ထို့ပြင်လည်း အလှတွင် ဘရဏီ၊ အလုပ်အကျွေးတွင် မယ်မဒ္ဒီ၊ သစ္စာအရာတွင် ကိန္နရီတို့ကဲ့သို့ ကောင်းခြင်း ငါးဖြာ ဆင်းအင်္ဂါနှင့် ပြည့်စုံသူကို လက်ထပ်ပေါင်းသင်းဆက်ဆံခြင်း ပြုရသည့်အတွက် သင်သည် ကုသိုလ်ကံထူးသူတစ်ဦး ဖြစ်ကြောင်းကိုလည်း မကြာခဏ ပြောကြားပါလေ။ အကယ်၍ ဝက်သားကြော်သည် သားရေကဲ့သို့ မာပြီးလျှင် ချက်ထားသော ထမင်းသည် ထမနဲဖြစ်နေသော်လည်း သင်၏ဇနီးကို မဆူပါနှင့်။ ‘ခင်ရေ ဒီကနေ့ ခါတိုင်း လက်ရာမျိုး မဟုတ်ပါကလားဟေ့’ ဟု ပြောလျှင် သူ့လက်တွေကို မီးလောင်စေကာမူ အလောင်ခံ၍ သင့်အကြိုက်ဖြစ်အောင် ချက်ပေးပေလိမ့်မည်။

သို့ရာတွင် ယခုနည်းများကို ဖြုန်းကနဲ အသုံးမပြုလေနှင့်။ သင့်ကို သင်၏ ဇနီးသည် မယုံသင်္ကာ ဖြစ်လိမ့်မည်။ သို့ရာတွင် ယနေ့ သို့မဟုတ် မနက်ဖြန်ညနေ အလုပ်မှ ပြန်လာသောအခါ သင်၏ ဇနီးသည်အဖို့ ပန်းတစ်စည်း သို့မဟုတ် သူကြိုက်တတ်သည့် အစားအစာတစ်ခုခုကို ဝယ်သွားပါ၊ ယခုစာကို ဖတ်ပြီးလျှင် ‘အိမ်း ငါလုပ်ဦးမှပဲ’ ဟူ၍ ပြောရုံနှင့် မပြီးစေနှင့်၊ လုပ်ဖြစ်အောင်လုပ်ပါ။ သင် ဝယ်ယူသွားသော အရာများကို သင်၏ ဇနီးသည်သို့ ပေးသောအခါ ဘာမျှမပြောဘဲ ရှုတည်တည်မပေးပါနှင့်။ ချစ်ခင်ယုယသော စကားများကို ခပ်ပြုံးပြုံးပြော၍ ပေးပါ။ လင်နှင့်မယားတို့သည် ဤနည်းကို လိုက်နာဆောင်ရွက်ကြလျှင် လင်မယား ခြောက်စုံ လက်ထပ်သည့်အနက် တစ်စုံတလေမျှပင် ကွာရှင်းလိမ့်မည်ဟု ကျွန်ုပ် မထင်။

မိန်းမတစ်ယောက်သည် သင့်ကို ချစ်ကြိုက်လာအောင် လုပ်ရန် နည်းကောင်းကို သင် အလိုရှိသလား။ အလိုရှိလျှင် ထိုနည်းကို ကျွန်ုပ်ပေးမည်။ သို့ရာတွင် ထိုနည်းသည် ကျွန်ုပ်၏ နည်းမဟုတ်။ ဒေါ်ရသီဒစ်၏ နည်းဖြစ်လေသည်။ တစ်ခါတုန်းက ဒေါ်ရသီဒစ်သည် မိန်းမ ၂၃ ယောက်အထိ သူတို့စုထားသော ပစ္စည်းများနှင့်တကွ အရချိုင်နိုင်သော နာမည်ကျော် မယားများသူတစ်ဦးနှင့် သွားရောက်တွေ့ဆုံခဲ့ဖူး၏။ (ထိုသူသည် ထောင်ဒဏ်ခံနေရသောကြောင့် သူ့ကိုတွေ့ရသော နေရာသည် ထောင်ဖြစ်ကြောင်းကို စကားမစပ် ပြောလိုက်ပါရစေ) ထိုသူ့ထံမှ မိန်းမချစ်အောင် လုပ်နိုင်သည့်ဆေးနည်းကို ပေးပါဟု တောင်းရာ ‘ဒါ အဆန်း မဟုတ်ပါဘူး၊ မိန်းမတွေကို သူတို့ရဲ့ အကြောင်းကိုသာ ပြော၊ ကျရော’ ဟု ထိုလူက ပြန်ပြောဖူးလေသည်။

ထိုနည်းကို မိန်းမများကျအောင်သာ မဟုတ်ဘဲ ယောက်ျားများကိုလည်း ကျအောင် အသုံးပြုနိုင်လေသည်။ ‘လူတစ်ယောက်သို့ သူ့အကြောင်းကိုသာ လျှောက်၍ပြောလျှင် ထိုသူသည် နာရီပေါင်းများစွာ မငြီးငွေ့ဘဲ နားထောင်လိမ့်မည်’ ဟု ဗြိတိသျှနိုင်ငံတော်ကြီး တစ်ခုလုံးကို အထူးကျွမ်းကျင်စွာ အုပ်ချုပ်သွားခဲ့ဖူးသော နန်းရင်းဝန်ကြီး ဒစ်ဇရေလီက ပြောခဲ့ဖူး၏။ ထို့ကြောင့် သင့်ကို လူကြိုက်များစေလိုလျှင် တစ်ဖက်သားအား သူ့ကိုယ်ကိုသူ အထင်ကြီးလာအောင် လုပ်ပေးပါ။ ဤသို့လုပ်ရာတွင် စိတ်ရောကိုယ်ပါ လုပ်ပေးပါ။

သင်သည် ဤစာအုပ်ကို ဖတ်နေသည်မှာ အချိန်အတော် ကြာသွားပေပြီ။ စာအုပ်ကိုပိတ်၍ သင်၏ ဆေးတံမှ ပြာများကို ခေါက်ထုတ်လိုက်ပြီးလျှင် ဤအခန်းတွင်ပါသော ချီးမွမ်းသည့် နည်းကို သင်နှင့် ပထမဆုံးတွေ့ရသော လူအပေါ်တွင် စမ်းကြည့်ပါ။ မျက်လှည့်ပြသကဲ့သို့ ထူးခြားသည်ကို သင် တွေ့ရပေအံ့။

မူရင်းရေးသားသူ DALE CARNEGIE | ဘာသာပြန်ဆိုသူ ဦးနု၏ မိတ္တဗလဋ္ဋီကာစာအုပ်မှ ကူးယူဖော်ပြသည်။

အတွေးအခေါ်

Open More Online

Related Posts