ဆူပူပြောဆိုခြင်းကို စိတ်အချရဆုံး ကာကွယ်နည်း (အပိုင်း – ၂)

ဆူပူပြောဆိုခြင်းကို စိတ်အချရဆုံး ကာကွယ်နည်း (အပိုင်း – ၂)
အိမ်ရှင်မသည် သူ့ကြက်ခြံကို သူနှင့်လိုက်ကြည့်ရန် ကျွန်ုပ်တို့ကို ခေါ်သွား၏။ သူ့လက်ရာ ခြေရာကလေးများကို မြင်သောအခါ ကျွန်ုပ်သည် စိတ်ပါလက်ပါ ချီးကျူးတော့သည်။ ကြက်များကို ကျွေးရန် မည်သည့်အစာတော်သည်၊ မည်သည့်အပူအအေးသည် ကြက်များနှင့်တော်သည် အစရှိသော အကြောင်းများကို ကျွန်ုပ်ကပြော၍ သူ့ထံမှလည်း အချို့အချက်အလက်များတွင် အကြံဉာဏ်တောင်းယူ၏။ များမကြာမီ တစ်ဦးသိသည့်အရာကို တစ်ဦးကပြောရင်း ကျွန်ုပ်တို့သည် စကားလက်ဆုံကျနေလေပြီ။

များမကြာမီ သူကပင်စတင်၍ သူ၏အိမ်နီးနားချင်းများက သူတို့၏ကြက်ခြံထဲတွင် လျှပ်စစ်မီးများထွန်းပေးသောကြောင့် ကြက်ဥကပို၍ဥသည်ဟု ပြောဆိုသံကြားရပုံကို ကျွန်ုပ်အား ပြောပြ၏။ ထို့နောက် ဤကဲ့သို့ လျှပ်စစ်ဓာတ်မီးများ ထွန်းခြင်းဖြင့် သူတို့ပြောတိုင်း ဟုတ်မဟုတ်ကို ကျွန်ုပ်သိသမျှ ပြောကြားရန် ကျွန်ုပ်ထံမှ အကြံဉာဏ်တောင်းလေသည်။

တနင်္ဂနွေ နှစ်ပတ်မျှကြာသောအခါ လျှပ်စစ်ဓာတ်မီးရောင်များအောက်တွင် မစ္စစ် ဒြပ်တင်ဗရော့၏ ကြက်မတို့သည် မြူးလျက်ရှိကြ၏။ ကျွန်ုပ်မှာ ကုန်ရောင်းရ၍ မစ္စစ် ဒြပ်ကင်းဗရော့မှာလည်း ကြက်ဥများ ပို၍ရလေသည်။ နှစ်ဦးနှစ်ဖက်စလုံး ကျေနပ်၍ နှစ်ဦးနှစ်ဖက်စလုံး အကျိုးရှိကြ၏။

အကယ်၍သာ ကျွန်ုပ်သည် မစ္စဒြပ်ကင်ဗရော့ကို ရှေးဦးစွာ စကားဝအောင် မပြောစေလျှင် ထိုအိမ်ရှင်မအား ဘယ်နည်းနှင့်မျှ ကျွန်ုပ်၏လျှပ်စစ်ဓာတ်များကို ရောင်းရမည်မဟုတ်ပေ။ ထိုကဲ့သို့သော လူမျိုးကို ဘယ်အခါမျှ ရောင်း၍မရ။ သူတို့ ဝယ်ချင်လာအောင် လုပ်မှ ဝယ်မည်ဖြစ်၏။

များမကြာမီက နယူးယောက် ဟာရယ်ထရိဗျွန်း သတင်းစာများ၏ ငွေရေးကြေးရေး ကော်လံတွင် အလုပ်ရည်ဝသော လူတစ်ယောက်ကို အလိုရှိကြောင်း ကြော်ငြာကြီးတစ်စောင် ပါလာ၏။ ချားတီးကျူဗစ်လစ် ဆိုသူသည် ထိုကြော်ငြာအရ လျှောက်လွှာတစ်စောင်ကို ပို့၏။ ရက်အနည်းငယ်ကြာသောအခါ အရွေးခံရန်အတွက် လူကိုယ်တိုင်လာရောက်ရန် အကြောင်းကြားစာတစ်စောင်ကို ရရှိလေသည်။ အရွေးခံရန်အတွက် မသွားရောက်မီ သူသွားတွေ့ရမည့် သူဌေး၏ အကြောင်းကို တတ်နိုင်သမျှသိရှိရအောင် စုံစမ်း၏။ ထိုသူဌေးကြီးနှင့် တွေ့ဆုံသောအခါ မစ္စတာကျူဗယ်လစ်က စ၍

‘ဦး မင်းတို့လို လုပ်ရည်ကိုင်ရည်နဲ့ပြည့်စုံတဲ့ ကုမ္ပဏီမျိုးနဲ့ ဆက်သွယ်ရမယ်ဆိုရင် ကျွန်တော်တို့မှာ အင်မတန်ဂုဏ်ရှိမှာပါပဲ၊ ဦးရဲ့ကုမ္ပဏီကိုစ ကာစ ၂၈ နှစ်လောက်တုန်းက ဦးတို့မှာ စာရေးခန်းတစ်ခုနဲ့ လက်ရေးတို စာရေးတစ်ယောက်ကနေစပြီး စရတယ်လို့ ကျွန်တော်ကြားဖူးပါတယ်၊ ဟုတ်ပါရဲ့လား ခင်ဗျာ’

အလုပ်အကိုင် အပေါက်အလမ်းတည့်နေသော လူတိုင်းလိုလိုပင် အလုပ်လုပ်စက မည်ကဲ့သို့လုံးပမ်းခဲ့ရသည်ကို ပြန်ပြောချင်သော ဆန္ဒရှိကြပေသည်။ ဤသူဌေးကြီးသည် ဒေါ်လာငွေ ၄၅၀ တည်းနှင့် မည်ကဲ့သို့ လုံးပမ်းခဲ့ရပုံကို အချိန်အတော်ကြာစွာ လျှောက်၍ပြော၏။ စိတ်ပျက်ခြင်း၊ တစ်ဖက်သားတို့၏ လှောင်ပြောင်ကဲ့ရဲ့ခြင်းတို့ကို မည်ကဲ့သို့ ခုခံဖြိုဖျက်ခဲ့ရပုံ၊ တနင်္ဂနွေနေ့များနှင့်တကွ အခြားအလုပ်ပိတ်ရက်များတွင်လည်း တစ်နေ့လျှင် ၁၂ နာရီမှ ၁၆ နာရီအထိ အလုပ်လုပ်ခဲ့ရပုံ၊ နယူးယောက်မြို့ရှိ သူဌေးကြီးများကိုယ်တိုင် သူ့ထံသို့ လာရောက်ပြီးလျှင် အကြံဉာဏ်တောင်းရသည့်အခြေသို့ ရောက်အောင် မည်ကဲ့သို့ ကြိုးစားခဲ့ရပုံတို့ကိုပါ ပြောပြလေသည်။

သူအောင်မြင်ခဲ့သည်ကို သူသည် ကောင်းစွာ ဂုဏ်ယူလျက်ရှိ၏။ စင်စစ်မှာလည်း ဂုဏ်ယူထိုက်ပေ၏။ ထို့ကြောင့် သူ့ဂုဏ်ယူထိုက်သောအောင်မြင်မှုကို သူသည် ကျကျနန ဂုဏ်ယူ၍ ပြောနေ၏။ နောက်ဆုံးတွင် သူဌေးကြီးသည် မစ္စတာကျူဗယ်လစ်ကို မေးခွန်းအနည်းငယ်ကို မေးစမ်းပြီးလျှင် သူ၏လက်အောက် တစ်ယောက်ကို ခေါ်၍ ‘တို့လိုချင်နေတဲ့လူဟာ ဒီလူပဲလို့ ငါထင်တယ်’ ဟု ပြောလေသည်။

မစ္စတာကျူဗယ်လစ်သည် သူဌေးကြီး၏အကြောင်းကို ကြိုတင်စုံစမ်းထား၏။ သူဌေးကြီး၏ စိတ်ဝင်စားသောအရာများနှင့် သူဌေးကြီး၏ကိစ္စများတွင် သူကိုယ်တိုင် အာရုံစူးစိုက်လျက်ရှိကြောင်းကို ပြ၏။ တစ်ဖက်သားကို စကားဝအောင် ပြောခွင့်ပေးပြီးလျှင် သူ့အပေါ်တွင် သဘောကျလာအောင် လုပ်၏။ အမှန်ပြောရလျှင် ကျွန်ုပ်တို့၏ သူငယ်ချင်းများပင်လျှင် တစ်ပါးသူ၏အကြောင်း ပြောဆိုနေသည်ကို နားထောင်ရခြင်းထက် သူတို့အကြောင်းကို သူတို့ ပြောလိုကြပေသည်။

လာ-ရိုရှဖူးကိုးဆိုသူ ပြင်သစ်ပညာရှိကြီးကမူကား ‘သင်သည် ရန်သူပေါများစေချင်လျှင် သင်၏သူငယ်ချင်းများထက် သာအောင်လုပ်ပါ၊ သို့ရာတွင် မိတ်ဆွေပေါများစေချင်လျှင် သင့်ထက် သင်၏သူငယ်ချင်းများက သာပါစေ’ ဟူ၍ ပြောဆိုဖူးလေသည်။

ဒီစကားသည် အဘယ့်ကြောင့် မှန်ရသလဲ။ အကြောင်းမူကား ကျွန်ုပ်တို့၏ သူငယ်ချင်းများသည် ကျွန်ုပ်တို့ထက် သာသောအခါ ထိုကဲ့သို့လာခြင်းသည် သူတို့ကိုယ်ကို သူတို့ အထင်ကြီးစေသည်။ သို့ရာတွင် ကျွန်ုပ်တို့သည် သူတို့ထက် သာသောအခါ ထိုကဲ့သို့သာခြင်းသည် သူတို့ကိုယ်ကို သူတို့အထင်သေးစေသည် ဖြစ်သောကြောင့် သူတို့၏ စိတ်ထဲ ကျွန်ုပ်အပေါ်တွင် မနာလိုသော စိတ်ဓာတ်များနှင့် သဝန်ကြောင်သော စိတ်ဓာတ်များ ပေါ်ပေါက်လာစေသည်။

ဂျာမနီလူမျိုးများတွင် စကားပုံတစ်ခု ရှိလေသည်။ ထိုစကားပုံကို မြန်မာလိုပြန်လျှင် အောက်ပါအတိုင်း ဖြစ်၏။ ကျွန်ုပ်တို့၏ အပျော်ရွှင်ဆုံး ပျော်ခြင်းမျိုးမှာ ကျွန်ုပ်တို့ မနာလိုနေသော တစ်ဦးတစ်ယောက်၏ ဒုက္ခရောက်ရပုံများကို မြင်ရသောအခါပင် ဖြစ်လေသည်။  မှန်လှပေ၏။ အချို့သော သူငယ်ချင်းတို့သည် သင် အောင်မြင်သည်ထက် သင် ဒုက္ခရောက်သည်ကို ပို၍ အားရကြလေသည်။

ထို့ကြောင့် ကျွန်ုပ်တို့၏ အစွမ်းသတ္တိ လုပ်ရည်ကိုင်ရည်များကို အတိုချုပ်နိုင်သမျှ ချုပ်ကြစို့။ ကျွန်ုပ်တို့သည် သိက္ခာရှိအောင် နေကြပါစို့။ ဤသို့ပြုလုပ်ခြင်းသည် ခရီးအတော်ရောက်၏။ အာဗင်ကော့ဆိုသူသည် ထိုနည်းမှန်ကိုပင် လုပ်ခဲ့ဖူး၏။ တစ်ခါတုန်းက မစ္စတာကော့ကို ရုံးပေါ်တွင် ရှေ့နေတစ်ဦးက ‘မစ္စတာကော့၊ ခင်ဗျားဟာ အမေရိကန်ပြည်တွင် နာမည်အကျော်ကြားဆုံးသော စာရေးဆရာကြီးတစ်ဦးဖြစ်သည်ဟု ကျွန်တော် ကြားသိရပါသည်၊ ဟုတ်ပါရဲ့လား’ ဟု မေးလေသည်။

ထိုအမေးကို ‘ကုသိုလ်ကံထောက်မလို့ ကျွန်တော်ဟာ တော်တာထက်ပိုပြီး နာမည်ကြီးနေပါတယ်’ ဟု မစ္စတာကော့က ပြန်ဖြေလေသည်။

ကျွန်ုပ်တို့သည် ကိုယ့်ကိုယ်ကိုယ် ဖော်ချင်သောစိတ်ကို နှိမ်ထားသင့်လေသည်။ အဘယ့်ကြောင့်ဆိုသော် ကျွန်ုပ်တို့သည် သိပ်ကြီးကျယ်သောလူများ မဟုတ်ကြပေ။ ကျွန်ုပ်တို့သည် တစ်နေ့ကျလျှင် သေကြလိမ့်မည်။ သေသည်နေ့မှ အနှစ်တစ်ရာ မတိုင်မီ ကျွန်ုပ်တို့ကို မေ့ပေတော့မည်။ သက်တမ်းသည် အလွန်တိုသဖြင့် ကျွန်ုပ်တို့၏ သေးသိမ်သော အောင်မြင်ခြင်းကလေးတို့ကို တစ်ဖက်သားနာငြီးလာအောင် ဂုဏ်ဖော်နေခြင်းဖြင့် အချိန်မကုန်စေချင်။ ကျွန်ုပ်တို့က ပြောမည့်အစား တစ်ဖက်သားက ကျွန်ုပ်တို့ကို ပြောရန်ကိုသာ အားပေးကြပါစို့။ သေသေချာချာ တွေးကြည့်ပါ။ သင့်မှာကြွားစရာများများမရှိပါ။ သင့်ကို အရူးတစ်ယောက်မဖြစ်အောင် မည်သည့်အရာက တားထားသည်ကို သင်သိပါ၏လော။ သင်၏လည်ပင်းတွင် အကြောတစ်ခုရှိ၏။ ထိုအကြောထဲတွင် အိုင်အိုဒင်းဆေးရည်နှင့်တူသော အရည်တစ်မျိုး ရှိလေသည်။ ဆေးဆိုင်တစ်ဆိုင်တွင် တစ်ပဲလောက်ပေးလျှင် ထိုအရည်အချင်းမျိုး ရနိုင်၏။ ထိုအရည်ကို ထိုအကြောထဲမှ ထုတ်ပစ်လိုက်လျှင် အထုတ်ပစ်ခံရသောသူသည် လူကောင်းပကတိမှ လူရူးအဖြစ်သို့ ရောက်သွားမည်ဖြစ်၏။ စင်စစ်မှာမူကား လူတစ်ယောက်ကို လူရူးတစ်ယောက်မဖြစ်အောင် ထိုအရည်ကပင် တားဆီးထားသည်ဖြစ်ရာ ထိုတစ်ပဲတန်ကလေးအတွက် ကျွန်ုပ်တို့သည် အကြီးအကျယ် ကြွားဝါနေရန် မလိုပေ။

ထို့ကြောင့် တစ်ဖက်သားကို ကျွန်ုပ်တို့ဘက်သို့ပါအောင် ဆွဲလိုလျှင် တစ်ဖက်သားကို သူပြောချင်တာ ဝအောင်ပြောပါစေ။

ဆူပူပြောဆိုခြင်းကို စိတ်အချရဆုံး ကာကွယ်နည်

မူရင်းရေးသားသူ DALE CARNEGIE | ဘာသာပြန်ဆိုသူ ဦးနု၏ မိတ္တဗလဋ္ဋီကာစာအုပ်မှ ကူးယူဖော်ပြသည်။

အတွေးအခေါ်

# Open More Online