လောကကြီးက လူတိုင်းကို သာတူညီမျှ အခွင့်အရေး ပေးထားပါတယ်။ လူမျိုးဘာသာ မရွေး ဆင်းရဲချမ်းသာမရွေးပါ။ ဘယ်လို အခွင့်အရေးတွေ ပေးထားတာလဲ။ လောကကြီးက အနီ၊ အဝါ၊ အပြာဆိုတဲ့ အခြေခံအရောင် သုံးမျိုးပေးထားပါတယ်။ သုံးတတ်သူက အဲဒီအရောင်တွေကို ရောနှောစပ်ပြီး လှပတဲ့ပန်းချီကားတွေ ဖန်တီးလိုက်တယ်။ လောကကြီးက ဒို၊ ရေ၊ မီ၊ ဖာ စတဲ့ အခြေခံသံစဉ် ၇ မျိုးကို ပေးထားတယ်။ သုံးတတ်သူက အဲဒါတွေကို ရောနှောလိုက်ပြီး သာယာနာပျော်ဖွယ်ဖြစ်တဲ့ တေးဂီတတွေကို ဖန်တီးလိုက်တယ်။
လောကကြီးက က၊ ခ၊ ဂ၊ (သို့မဟုတ်) A, B, C, D စတဲ့ စာလုံးအက္ခရာတွေကို ပေးထားတယ်။ သုံးတတ်သူက အပြောင်မြောက်ဆုံး ဝတ္ထု၊ ကဗျာ၊ ဆောင်းပါးတွေ ဖန်တီးလိုက်တယ်။ အဲဒီလို သုံးတတ်ဖို့ ဘာလိုသလဲ၊ ဖန်တီးတတ်တဲ့ အသိဉာဏ်ပညာလိုပါတယ်။ ပါရမီပါရင်တော့ ဒီ့ထက်ပိုကောင်းအောင် ဖန်တီးနိုင်တာပေါ့။
ဗန်းမော် သိန်းဖေ ရေးသားထားသော မျှဝေလိုသောအတွေးများ စာအုပ်မှ ကူးယူဖော်ပြထားပါသည်။
