သဘောပေါက်အောင် လုပ်ရန်နည်း (အပိုင်း – ၁) ~~~~
သင်သည် ဒေါသထွက်သောအခါ တစ်ဖက်သားအား သင်ပြောလိုသမျှအရာများကို ပြောလိုက်ရလျှင် သင့်မှာမူကား စိတ်ပြေသွားမည် အမှန်ဖြစ်၏။ သို့ရာတွင် အပြောခံရသူတွင် ဘယ့်နှယ်နေပါမည်နည်း။ သင်ကျေနပ်သကဲ့သို့ ကျေနပ်နိုင်ပါမည်လား။ ဒေါသနှင့်ပြောသော သင်၏အသံနှင့် ဒေါသနှင့်ကြည့်သော သင်၏မျက်နှာထားတို့ကြောင့် ထိုလူသည် သင့်ဘက်သို့ ပါလိမ့်မည်လား။
သင်သည် သင်၏လက်သီးကိုဆုပ်၍ ကျွန်ုပ်ထံသို့ လာလျှင် ကျွန်ုပ်ကလည်း သင့်ကို လက်သီးဆုပ်ရန် အဆင်သင့်ပဲ။ သို့ရာတွင် သင်သည် ကျွန်ုပ်ထံသို့လာ၍ သည်ကိစ္စကို ကျုပ်တို့ အတူတူထိုင်ပြီး စဉ်းစားကြရအောင်။ စဉ်းစားလို့ သဘောချင်း ကွဲလွဲကြရင်လည်း ဘာကြောင့် သဘောကွဲလွဲရတယ်၊ သဘောကွဲလွဲတဲ့ အချက်တွေဟာ ဘာတွေဆိုတာကို ကျုပ်တို့ကောင်းစွာ သိရမှာပဲဟု ပြောပြလျှင် ကျွန်ုပ်တို့သည် တစ်ဦးနှင့်တစ်ဦး နီးစပ်ဖို့ရာ သိပ်မဝေးတော့သည်ကို တွေ့ရမည်ဖြစ်၏။ ထို့ပြင်လည်း ကျွန်ုပ်တို့ သဘောကွဲလွဲသော အချက်များက နည်း၍ သဘောတူညီသောအချက်က များကြောင်းကိုလည်း တွေ့ရမည့်အပြင် ကျွန်ုပ်တို့မှာသာ တစ်ဦးနှင့်တစ်ဦး ညီညွတ်လိုသော ဆန္ဒနှင့်ဇွဲ္ဂရှိပါလျှင် ကျွန်ုပ်တို့သည် ညီညွတ်ကြတော့မည့်အကြောင်းကိုလည်း တွေ့ရဦးမည်ဖြစ်၏ဟူ၍ ဝုဒရိုး ဝီလဆင်က ပြောပြဖူး၏။
ဝီလဆင်၏ စကားကို ဂျွန်ဒီရော့ဖဲလား (အငယ်) ထက် ပို၍နားထောင်သောသူ ရှိမည်မဟုတ်ပေ။ ၁၉၁၅ ခုနှစ်လောက်က ကော်လိုရာဒိုနယ်တွင် ရော့ဖဲလားထက်ပို၍ အမုန်းခံရသောသူ မရှိပေ။ အမေရိကန်ပြည်၏ အလုပ်သမားများ သမိုင်းတွင် အလွန်တရာကြောက်မက်ဖွယ်ကောင်းသော သပိတ်ကိစ္စကြီးသည် ထိုနယ်တွင် ဖြစ်ပေါ်နေသည်မှာ နှစ်နှစ်မျှ ကြာလေပြီ။ အကြမ်းဖက်ချင်သော အလုပ်သမားများသည် ‘ကော်လိုရာဒို မီးသွေးနှင့် သံကုမ္ပဏီ’ မှ လခကို ပို၍ တောင်းလျက်ရှိကြ၏။ ထိုကုမ္ပဏီကို ရော့ဖဲလားသည် အုပ်ချုပ်လျက် ရှိလေသည်။ အလုပ်သမားများသည် အလုပ်ရုံများကို ဖျက်ဆီးပစ်သဖြင့် စစ်တပ်များကိုခေါ်၍ နှိမ်နင်းရသည့်အတွက် အလုပ်သမားများစွာတို့သည် သေကြေပျက်စီးကြရ၏။
ဤကဲ့သို့ အလုပ်သမားနှင့် ဓနရှင်တို့သည် တစ်ဖက်နှင့်တစ်ဖက် မုန်းတီးသောစိတ်ဓာတ်များ လျှံကျနေသည့်အချိန်တွင် ရော့ဖဲလားသည် အလုပ်သမားများကို သူ့ဘက်သို့ပါအောင် ဆွဲလိုသောဆန္ဒရှိ၏။ ထိုဆန္ဒရှိသည့်အတိုင်း သူသည် ကြိုးစား၏။ မည်ကဲ့သို့ ကြိုးစားပါသနည်း။ ဤသို့ပင်တည်း။ ရော့ဖဲလားသည် အလုပ်သမားနှင့် ခင်ခင်မင်မင် ရင်းရင်းနှီးနှီးဖြစ်အောင် ရက်သတ္တပတ်ပေါင်းများစွာ ပေါင်းသင်းဆက်ဆံပြီးနောက် အလုပ်သမားခေါင်းဆောင်များနှင့် တွေ့ဆုံရန် ရက်ချိန်းလေသည်။ ထိုသူတို့နှင့် တွေ့သောအခါတွင် သူပြောသောစကားသည် စံတင်လောက်ပေသည်။ ထိုစကားကို ပြောပြီးနောက် အံ့သြဖွယ်ကောင်းလောက်အောင် ကိစ္စများသည် ပြီးမြောက်လေသည်။ ရော့ဖဲလားကို နစ်မွန်းပျက်စီးအောင် ဖန်တီးနေသော အမုန်းဓာတ် လှိုင်းဂယက်ကြီးသည် ငြိမ်သက်၍ သွားလေသည်။ ထိုစကားကို ကြားရပြီးနောက် သူ့ကို ချစ်ခင်သူ ကြည်ညိုသူများ အလွန်ပေါများလာလေသည်။ ပြောရန်ရှိသောစကားများကို ရင်းရင်းနှီးနှီး သာယာချေငံစွာ ပြောသောကြောင့် အလုပ်သမားတို့သည် အလွန်ကျေနပ်ကြပြီးလျှင် သူတို့ကိုယ်တိုင် ပြင်းပြင်းထန်ထန် တောင်းဆိုခဲ့သော လခတိုးပေးရန်ကိစ္စကို နောက်ထပ်မပြောတော့ဘဲ အလုပ်ပြန်ဆင်းကြလေသည်။
သူ၏ စကားစပုံကို ကြည့်ပါ။ မည်မျှ သာယာချေငံသော စကားလုံးတို့ဖြင့် တန်ဆာဆင်ထားပါသနည်း။ ရော့ဖဲလား စကားပြောနေသောသူများသည် အခြားမဟုတ်။ ရက်အနည်းငယ်ခန့်က သူ့ကို သစ်ပင်တစ်ပင်တွင် ကြိုးဆွဲချ၍ သတ်ချင်သော အလုပ်သမားများဖြစ်ကြောင်း သူ၏စကားကိုဖတ်ရင်း သင်သည် သတိရပါစေ။ ဆင်းရဲသားဝန်ထမ်း ဆေးဆရာများနှင့် တွေ့ဆုံစကားပြောရာတွင်ပင်လျှင် ထိုအခါက အလုပ်သမားများကို ပြောစဉ်ကလောက် ခန့်ညားတည်ကြည်၍ ဖော်ရွေခြင်း ရှိမည်မဟုတ်ပေ။ သူ၏စကားထဲတွင် ‘ဤသို့ လာရောက်ပြောဆိုရခြင်းကို ဂုဏ်ယူပါသည်’ ‘အဆွေတို့၏အိမ်များကို အလည်အပတ်ရောက်ရှိပြီးနောက် အဆွေတို့၏ သားမယားများနှင့် ကလေးများကိုပါ တွေ့ခဲ့ရသဖြင့် ကျွန်ုပ်တို့ယခုတွေ့ရသည်မှာ သူစိမ်းအဖြစ်နှင့် တွေ့ရခြင်းမဟုတ်ပါ’ ‘မိတ်ဆွေရင်းချာများ’ အဖြစ်ဖြင့်သာ တွေ့ကြရခြင်း ဖြစ်ပါသည်။ နှစ်ဦးနှစ်ဖက်စလုံးက ‘ခင်မင်ရင်းနှီးသော စိတ်ဓာတ်များ’ ‘ကျုပ်တို့ခင်ဗျားတို့ နှစ်ဦးစလုံး၏ အကျိုးအတွက်’ အဆွေတို့၏ ထောက်ထားညှာတာစွာနှင့် ခွင့်ပြုချက်ကြောင့်သာလျှင် ဤနေရာသို့ ကျုပ်ရောက်ရပါသည် အစရှိသော စကားလုံးများကို ဆီလျော်သည့်နေရာတွင် ကြည့်၍ ထည့်သွားလေသည်။
ရော့ဖဲလားသည် သူ၏စကားကို အောက်ပါအတိုင်း စ၍ ပြောကြား၏။ ‘ကျုပ် တစ်သက်မှာဖြင့် ယနေ့ဟာ အပျော်ဆုံးနေ့ထူးနေ့မြတ်ကြီးပါပဲ၊ ကျုပ် ကုမ္ပဏီကြီး၏ အလုပ်သမားကိုယ်စားလှယ်များ၊ ကုမ္ပဏီအရာရှိများနှင့် ကုမ္ပဏီ၏ ရုံးအုပ်များအား ယခုလို တပေါင်းတစည်းတည်း တွေ့ဆုံရသော အခွင့်အလမ်းကို ကုသိုလ်ထောက်မ၍ ရရှိခြင်းသည် ဤအကြိမ်သည် ပထမဆုံးပါပဲ၊ ဤကဲ့သို့ လာရောက်ရသည့်အတွက် အထူးဂုဏ်ယူကြောင်းကိုလည်း ကျုပ်သစ္စာဆိုပါတယ်၊ ဤသို့ တွေ့ရခြင်းလည်း ကျုပ်အသက်ရှင်နေသရွေ့ မေ့နိုင်တော့မည် မဟုတ်ပါ၊ ယခုအစည်းအဝေးကို တနင်္ဂနွေ နှစ်ပတ်လောက်တုန်းကသာ ကျင်းပခဲ့ပါလျှင် အဆွေတို့အထဲမှ လူအနည်းငယ်လောက်ကိုသာ ကျုပ်သိပြီးလျှင် အဆွေတို့ရဲ့အလယ်မှာ ကျုပ်ဟာ သူစိမ်းပြင်ပြင် ဖြစ်နေတော့မှာပဲ၊ တောင်ဘက်ပိုင်းရှိ ကျောက်မီးသွေးတွင်းများကို တူးနေကြသော အလုပ်သမားများ၏ အိမ်များအားလုံးကို လှည့်လည်ကြည့်ရှုပြီးနောက် တခြားသို့ သွားရောက်နေကြသော အလုပ်သမားခေါင်းဆောင်များမှလွဲ၍ ကျန်ရှိသော ခေါင်းဆောင်အားလုံးနှင့် လွန်ခဲ့သော တနင်္ဂနွေအပတ်က ကိုယ်တိုင်နှီးနှောခဲ့ရသည့်ပြင် အဆွေတို့၏ သားမယားများနှင့် ကလေးများကိုပါ တွေ့ဆုံခဲ့ရသောကြောင့် ယခုတစ်ကြိမ်ပြန်တွေ့ရာတွင် ကျုပ်တို့သည် သူစိမ်းတစ်ရံစာများကဲ့သို့ မဟုတ်ဘဲ မိတ်ဆွေရင်းချာများကဲ့သို့ တွေ့ရှိရပါတယ်။ ယခုကဲ့သို့ နှစ်ဦးနှစ်ဖက်စလုံး ခင်မင်ရင်းနှီးနေကြသော စိတ်ဓာတ်များ တက်ကြွနေသည့်အခါမျိုးတွင် ကျုပ်တို့နှင့် အဆွေတို့နှစ်ဦးစလုံး အကျိုးရှိစေမည့် ပြဿနာများကို တွေ့ဆုံဆွေးနွေးရန် အခွင့်အလမ်းရသည့်အတွက် ကျုပ် အများကြီးဝမ်းသာပါတယ်။
‘ကျုပ်ဟာ ကုမ္ပဏီ၏ အရာရှိလည်းမဟုတ်၊ အလုပ်သမားများ၏ ကိုယ်စားလှယ်လည်းမဟုတ်သည့်အတွက် အရာရှိများနှင့် ကိုယ်စားလှယ်များ ဆွေးနွေးရာဖြစ်သော ဤအစည်းအဝေးသို့ ယခုလို တက်ရောက်ခွင့်ရခြင်းမှာ အဆွေတို့၏ ထောက်ထားညှာတာစွာ ခွင့်ပြုချက်အရသာလျှင် ဖြစ်ပါတယ်၊ ကျုပ်ဟာ အရာရှိလည်းမဟုတ်၊ ကိုယ်စားလှယ်လည်း မဟုတ်ငြားသော်လည်း ကုမ္ပဏီ၏အစုရှင်များနှင့် ဒါရိုက်တာ လူကြီးများ၏ ကိုယ်စားလှယ်ဖြစ်သောကြောင့် အဆွေတို့၏အကျိုးနှင့် ကျုပ်၏အကျိုးသည် တိုက်ရိုက်ဆက်သွယ်လျက်ရှိပါတယ်’
ရန်သူများကို မိတ်ဆွေဖြစ်လာအောင် လုပ်ရာတွင် ဤလိုစကားမျိုးကို စံနမူနာတင်ရန် မကောင်းပေဘူးလား။ အကယ်၍ ရော့ဖဲလားသည် ယခုကဲ့သို့ မပြောဘဲ အခြားနည်းနှင့် ပြောသည်ဟု ဆိုကြပါစို့။ ဥဒါဟရုဏ်၊ သူသည် သတ္တုတွင်းတူးသမားများနှင့် အငြင်းအခုံလုပ်ပြီးလျှင် ဝမ်းထဲရှိသမျှ ဖွင့်၍ချလိုက်သည်ဟု ဆိုကြပါစို့။ သူ၏ လေယူလေသိမ်းဖြင့်လည်းကောင်း၊ နိမိတ်ပြ စကားလုံးများဖြင့်လည်းကောင်း အလုပ်သမားများအား သူတို့၏တောင်းဆိုချက်သည် မှားသည်ဟူ၍ စွပ်စွဲပြောဆိုသည်ဟု ဆိုကြပါစို့။ သို့မဟုတ် အခြားသော အကိုးအကားမျိုးမျိုးဖြင့် အလုပ်သမားသာလျှင် မှားသည်ဟူသော စကားများကို ရော့ဖဲလားသည် ပြောကြားသည်ဟု ဆိုပါစို့။ ထိုနည်းကို အသုံးပြုလျှင် မည်ကဲ့သို့ ဖြစ်မည်နည်း။ အလုပ်သမားများသည် ပို၍ဒေါသဖြစ်လာလိမ့်မည်။ သူ့ပေါ်တွင် ပို၍အမုန်းကြီး မုန်းလာကြလိမ့်မည်။ ထို့ကြောင့် သူ့ကိုပို၍ ပုန်ကန်ကြပေလိမ့်မည်။
သဘောပေါက်အောင် လုပ်ရန်နည်
