ရွှင်လန်းချစ်ခင်မော်ကြည့်လျက် ထူးပင့်မည်။

ရွှင်လန်းချစ်ခင်မော်ကြည့်လျက် ထူးပင့်မည်။

ရွှင်လန်းချစ်ခင်မော်ကြည့်လျက် ထူးပင့်မည် တဲ့။ ဒါဟာအထူးသဖြင့် လူငယ်တွေနဲ့ ဆီလျော်ပါတယ်။ ရွှင်ရွှင်လန်းလန်း ချစ်ချစ်ခင်ခင်နဲ့ မော်ကြည့်ရမယ်။ အထက်ကိုကြည့်ရမယ်။ အောက်ကို မကြည့်ရဘူးဆိုတာ အဆင့်မြင့်မြင့်စဉ်းစားရမယ်။ မြင့်မြတ်တဲ့ စိတ်သဘောထားတွေ မွေးရမယ်။ ရွှင်ရွှင်လန်းလန်းရှိရမယ်။ လူငယ်ဖြစ်လျက်နဲ့ ရှုံ့ရှုံ့မဲ့မဲ့ သုန်သုန်မုန်မုန်နဲ့ ဖြစ်နေလို့ရှိရင် လူကြီးဘဝကျ ဘယ်လောက်စိတ်ညစ်စရာ ကောင်းမလဲ။ ဒါလည်းစဉ်းစားကြဦး။ ကိုယ်ငယ်တုန်းမှာ ရွှင်ရွှင်လန်းလန်းနေကြပါ။

အလုပ်က ဘယ်လောက်ပဲ ခက်ခက်ခဲခဲ ကိုယ့်ဘက်မှာ ဘာရှိသလဲ။ ကိုယ့်ဘက်မှာ ကျန်းမာရေး ရှိတယ်။ လူငယ်များဟာ ကျန်းမာတယ်။ ရှေ့မှာနှစ်တွေ နှစ်ပေါင်းများစွာ ရှိသေးတယ်။ လုပ်စရာအချိန် အများကြီးရှိသေးတယ်။

အဲ့ဒီတော့ ဘာပဲ လုပ်ရ လုပ်ရ၊ ဘယ်လောက်ပင်ပန်း ပင်ပန်း၊ နောက်ကျလို့ရှိရင် အများကြီးကောင်းနိုင်စရာတွေရှိတယ်

ဆိုပြီးတော့ ရွှင်ရွှင်လန်းလန်းနဲ့ နေကြပါ။ အဲ့ဒီလို ရွှင်ရွှင်လန်းလန်းနဲ့ နေကြတဲ့ သူများဟာ အကယ်၍ ကံမကောင်းလို့ အသက်မရှည်နိုင်သော်လည်း ကိုယ်နေခဲ့ရတဲ့ သက်တမ်းတိုအတွင်းမှာ ရွှင်ရွှင်လန်းလန်းနဲ့ ပြည့်ပြည့်ဝဝနေသွားရမှာ။ အဲ့ဒီတော့ ရွှင်လန်းချစ်ခင်မော့ကြည်လျက် ၊ ချစ်ခင်ရမယ်။

တစ်ယောက်နဲ့တစ်ယောက် မေတ္တာထားရမယ်။ လူငယ်များဟာ သံယောဇဉ် နည်းတယ်။ စွဲလန်းချက်တွေနည်းတယ်။ အဲ့ဒီတော့ အဲ့ဒီ အချိန်မှာ လူငယ်များရဲ့ နှလုံးသားထဲမှာ မေတ္တာတွေ အများကြီးထားနိုင်တယ်။

ကိုယ့်ရဲ့ မိတ်ဆွေတွေ၊ ကိုယ့်ရဲ့ သူငယ်ချင်းတွေ၊ ကိုယ့်ရဲ့ ဆွေမျိုးသားချင်းတွေကို ချစ်ချစ်ခင်ခင် ထားကြပါ။ ဒီချစ်ခင်တဲ့ စိတ်ကို မွေးကြပါ။ ဒါမှ ရင်းရင်းနှီးနှီး  ချစ်ချစ်ခင်ခင်နဲ့ အလုပ်မှာလည်း အောင်မြင်နိုင်တယ်။ ကိုယ့်ရဲ့ ကိုယ်ရေးကိုယ်တာ ကိစ္စတွေမှာလည်း အောင်မြင်နိုင်မှာ ဖြစ်ပါတယ်။

၁၉၈၉-ခုနှစ်၊ ဇန်နဝါရီ ၁၆ရက်၊ မြောင်းမြမြို့တွင် လူငယ်များအား ဒေါ်အောင်ဆန်းစုကြည် ငယ်စဉ်က သင်ကြားခဲ့ရသည့် အင်္ဂလိပ်ကဗျာ တစ်ပုဒ်ကို ရှင်းလင်းဟောပြောခဲ့ခြင်းဖြစ်ပါသည်။
ယင်းကဗျာသည် ၁၉၈၈-ခုနှစ်၊ ဒီဇင်ဘာလအတွင်း မော်လမြိုင်မြို့ရှိ လူငယ်များနှင့်တွေ့ဆုံချိန် ရွတ်ပြခဲ့သည့် ကဗျာတစ်ပုဒ်လည်းဖြစ်သည်။

ဖိုးစိုင်း (ဂျာနယ်လစ်) စုစည်းတင်ပြထားသော လူငယ်တို့အတွက် ဘဝခွန်အားပြောစကားများ၊ ဒေါ်အောင်ဆန်းစုကြည် စာအုပ်မှ ကူးယူဖော်ပြသည်။

Related Posts