အကြင်သူသည် ဤကိစ္စကို ဆောင်ရွက်နိုင်အံ့၊ ထိုသူ၏ နောက်သို့ တစ်ကမ္ဘာလုံး လိုက်အံ့။ အကြင်သူသည် ဤကိစ္စကို မဆောင်ရွက်နိုင်၊ ထိုသူသည် တစ်ယောက်တည်း နေရအံ့။
နွေရာသီတိုင်း ကျွန်ုပ်သည် မိန်းပြည်နယ်သို့ ငါးမျှားရန် တက်သွား၏။ ကျွန်ုပ်သည် ရှမ်းဆီးသီးနှင့် မလိုင်ကို နှစ်သက်၏။ သို့ရာတွင် ငါးများသည် အကြောင်းထူးတစ်ခုခုကြောင့် တီကောင်များကိုသာ ကြိုက်နှစ်သက်သည်ကို တွေ့ရ၏။ ထို့ကြောင့် ငါးမျှားရန် သွားသောအခါ ကျွန်ုပ်သည် ကျွန်ုပ် နှစ်သက်သည့်အစာကို မစဉ်းစားချေ။ ငါးများကြိုက်သည့် အစာအကြောင်းကိုသာ စဉ်းစားလေသည်။ ကျွန်ုပ်သည် ငါးများကို ရှမ်းဆီးသီး၊ မလိုင်တို့ဖြင့် မမျှားချေ။ ကျွန်ုပ်သည် တီကောင် သို့မဟုတ် နှံကောင်ကို ငါးရှေ့တွင် လှုပ်ပြပြီးနောက် ‘မင်းတို့ ဒါကို မစားချင်ဘူးလား’ ဟုသာ မေးလေသည်။
လူများကို မျှားသည့်အခါတွင်လည်း အဘယ်ကြောင့် ဤနည်းကို မလိုက်ဘဲ နေရမည်နည်း။ ဤနည်းသည် လွိုက်ဂျော့၏ လက်သုံးဖြစ်၏။ ဝီလဆန်၊ အော်လန်ဒို၊ ကလီးမင်းဆော စသော ကမ္ဘာ့စစ်ကြီးအတွင်းက ထင်ရှားခဲ့သည့် ခေါင်းဆောင်ကြီးများသည် လူအများ၏ ဖယ်ရှားမေ့လျော့ခြင်း ခံရသည်တိုင်အောင် လွိုက်ဂျော့မှာမူ ခေါင်းဆောင်ဖြစ်မြဲ ဖြစ်လျက်ရှိသည်။ ထိုသို့ အဘယ်ကြောင့် ဖြစ်ရသနည်းဟု သူ့ကို တစ်စုံတစ်ယောက်သောသူက မေးသောအခါ ‘ဤကဲ့သို့ ဖြစ်ရခြင်းမှာ အကြောင်းတစ်ကြောင်းကြောင့် ဟုဆိုလျှင် ထိုအကြောင်းသည် ဘယ်ငါးသည် ဘယ်အစာနှင့် မျှားရမည်ဟူသော အတတ်ကို တတ်ထားသောအကြောင်းပင် ဖြစ်ကောင်း ဖြစ်ပါလိမ့်မည်’ ဟု လွိုက်ဂျော့က ပြန်ပြောဖူး၏။
ကျွန်ုပ်တို့ ဘာကို အလိုရှိသည်ကို အဘယ်ကြောင့် ပြောနေမည်လဲ။ ဤသို့ပြောခြင်းသည် ကလေးကလားနိုင်၏။ ရယ်စရာကောင်း၏။ စင်စစ်မှာ သင်သည် သင်အလိုရှိသော အရာများတွင်သာ စိတ်ဝင်စားနေ၏။ အမြဲတမ်း စိတ်ဝင်စားလျက်ရှိ၏။ သို့ရာတွင် သင်စိတ်ဝင်စားသောအရာကို သင်ကလွဲ၍ မည်သူမျှ စိတ်မဝင်စားချေ။ သင်ကလွဲ၍ ကျန်ရှိသော အားလုံးလူတို့သည် သင်ကဲ့သို့ပင် ကိုယ်အလိုရှိရာတွင်သာ စိတ်ဝင်စားလျက် ရှိကြ၏။
ထို့ကြောင့် အခြားလူတစ်ဦးကို ကိုယ့်ဘက်ပါအောင် ဆွဲရန်အတွက် ကမ္ဘာပေါ်တွင် တစ်ခုတည်းသော နည်းလမ်းသည် ထိုလူအလိုရှိသော အရာကိုပြော၍ ထိုအရာကို ရအောင် ဘယ်လိုလုပ်ရမည်ကို ပြပေးခြင်းပင် ဖြစ်လေသည်။ မနက်ဖြန်တွင် တစ်စုံတစ်ရာကို လုပ်ဆောင်ခိုင်းချင်သောအခါ ဤအချက်ကို သတိရပါစေ။ ဆိုကြပါစို့။ သင်၏သားကို ဆေးလိပ်မသောက်စေလိုလျှင် ဆေးလိပ်မသောက်ရန် သူ့ကို သွား၍ တရားမဟောပါနှင့်။ ဆေးလိပ်သောက်ခြင်းဖြင့် သူဝါသနာပါသော ဘေ့စ်ဘောကိုသော်လည်း ကောင်းစွာမကစားနိုင်။ ကိုက်တစ်ရာပြေးပွဲကိုသော်လည်း နိုင်တော့မည်မဟုတ်ကြောင်း သူသိအောင် ပြပါ။
ကလေးသူငယ်များနျှင့်သော်လည်းကောင်း၊ နွားကလေးများနျှင့်သော်လည်းကောင်း၊ လူဝံနှင့်သော်လည်းကောင်း မည်သူနှင့်မဆို ဆက်ဆံရာတွင် ဤနည်းသည် လိုက်နာရန်ကောင်းသော နည်းတစ်နည်းဖြစ်လေသည်။ သက်သေပြပါအံ့။ ရပ်ဝေါ်ဒိုမီမာဆန်နှင့် သူ၏သားသည် တစ်နေ့တွင် နွားကလေးတစ်ကောင်ကို ကျီတစ်ခုတွင်းသို့ သွင်းရန် ကြိုးစားကြ၏။ သို့ရာတွင် ကိုယ်အလိုရှိရာသည့် အရာကိုသာ စဉ်းစားတတ်သည့် လူအများ မှားယွင်းနေကြသော အပြစ်ကို သူတို့နှစ်ဦး ကျူးလွန်နေကြ၏။ သူ့သားက နွားကလေးကို ရှေ့ကနေ၍ ဆွဲပြီးနောက် အီမာဆန်က နောက်ကနေ၍ အတင်းတွန်းပေး၏။ သို့ရာတွင် နွားကလေးကလည်း သူကြိုက်သည့်အရာကိုသာ သူလုပ်လျက်ရှိ၏။ အဘယ်ကြောင့်ဆိုသော် သူလည်း သူကြိုက်သည့်အရာတွင်သာ စိတ်ဝင်စားလျက် ရှိသောကြောင့်တည်း။ ထို့ကြောင့် သူသည် ခြေကို တောင့်ထားပြီးလျှင် သူစားနေသော စားကျက်မှ ထွက်မသွားဘဲ အတင်းရုန်းကန်နေ၏။ သားအဖနှစ်ယောက် အခက်ကြုံနေသည်ကို အိုင်ယာလန်ပြည်သူ အစေခံမသည် မြင်၏။ ထိုအစေခံမသည် အီမာဆန်ကဲ့သို့ ဆောင်းပါးများနှင့် စာအုပ်များကို မရေးတတ်။ သို့ရာတွင် အဖျင်းဆုံး ထိုအချိန်အခါတွင် နွားအကြောင်းကို သားအဖနှစ်ယောက်ထက် ပို၍သိ၏။ ထိုအစေခံမသည် နွားကလေး ဘာကြိုက်သည်ကို တွေးမိ၏။ ထို့ကြောင့် မိခင်တို့၏ ယုယခြင်းမျိုးဖြင့် နွားကလေး၏ ပါးစပ်ထဲသို့ သူ့လက်ညှိုးကို ထည့်လိုက်၏။ ထို့နောက် အစေခံမသည် ကျီထဲကို ရှေ့ကလျှောက်၍ဝင်လာရာ နွားကလေးသည် လက်ကိုစုပ်ရင်း နောက်က ထပ်ကြပ်မကွာ ဝင်လိုက်လာ၏။
မွေးသည့်နေ့မှစ၍ သင်လုပ်သမျှ အလုပ်တို့သည် တစ်စုံတစ်ခုကို လိုချင်သောကြောင့် ဖြစ်သည်။ သို့ဖြစ်လျှင် ရက်ခရော့သူနာပြုတပ်သို့ ဒေါ်လာငွေတစ်ရာကို သင်လှူလိုက်သောအခါတွင်လည်း တစ်စုံတစ်ခုကို အလိုရှိသောကြောင့်ပင်လောဟု မေးစရာရှိ၏။ ဟုတ်ကဲ့။ ဤအလုပ်သည်လည်း အခြားလုပ်ငန်းများကဲ့သို့ပင် တစ်စုံတစ်ခုကို လိုချင်၍ပင် ဖြစ်၏။ သင်သည် ရက်ခရော့သူနာပြုတပ်ကို ဒေါ်လာငွေတစ်ရာ လှူလိုက်ခြင်းသည် ဝေဒနာခံစားရသူများအား ကူညီထောက်ပံ့ခြင်းဖြင့် ကိုယ်ကျိုးမငဲ့ဘဲ မြင့်မြတ်သောအလုပ်ကို လုပ်ချင်သောကြောင့်ပင် ဖြစ်သည်။
‘ကျွန်ုပ်၏ ဆင်းရဲနွမ်းပါးဆုံးသော ဤညီအစ်ကိုတစ်စုကို ပြုစုခြင်းသည် ကျွန်ုပ်ကို ပြုစုခြင်းကဲ့သို့ပင် ဖြစ်သည်’။ ဤကဲ့သို့ မြင့်မြတ်သောအလုပ်ကို လုပ်လိုသောဆန္ဒ၏ ပြေငြိမ်းမှုထက် ဒေါ်လာငွေတစ်ရာကို ပို၍ မက်မောပါလျှင် ထိုဒါနကို သင်လုပ်မည်မဟုတ်။ ဟုတ်ကဲ့။ အလှူငွေမထည့်ဘဲနေရမည်ကို ရှက်၍သော်လည်းကောင်း၊ သင်၏ ဖောက်သည်တစ်ဦးဦးက ထည့်လိုက်ပါဟူ၍ တိုက်တွန်းသောကြောင့်သော်လည်းကောင်း ထိုဒါနကို သင်လုပ်လိုက်ရသည် ဆိုပါစို့။ ဘယ်လိုနည်းနှင့်ပင်လုပ်လုပ် သင်သည် တစ်စုံတစ်ခုကို အလိုရှိ၍ လှူသည်ဆိုသော စကားသည် မမှားနိုင်။
