ငါးခူငါးဆုပ်ချက်ပါဝင်သောပစ္စည်းများ
- ငါးခူ – အကောင်ကြီးတစ်ကောင်
- ကြက်သွန်နီ – လေးငါးလုံးခန့်
- ကြက်သွန်ဖြူ – နှစ်ကျပ်ခွဲသား
- ငရုတ်သီးပွ – ခြောက်တောင့်
- ဆား၊ ငံပြာရည် – သင့်ရုံ
- နနွင်း၊ ချင်း – သင့်ရုံ
- ဆီ – ငါးကျပ်သား
- ခရမ်းချဉ်သီး – လေးလုံး
ပြုလုပ်နည်းအဆင့်ဆင့်
- ငါးကို အရိအချွဲများ ကုန်စင်အောင် ပြာနှင့်တိုက်၍ ဆေးပါ၊ ခေါင်းဖြတ်၍ အူများထုတ်ပါ၊ အလယ်ရိုးနားမှကပ်၍ အသားကို လွှာယူပါ။ ထို့နောက် ၎င်းအသားလွှာကို နုပ်နုပ်စဉ်းပါ။
- ချင်း၊ ကြက်သွန်ဖြူ၊ ကြက်သွန်နီတို့ကို ထောင်း၍ တစ်ဝက်ကို ချန်ထားပြီး ကျန်တစ်ဝက်ကို စဉ်းကောများနှင့်အတူ ရောထောင်းပါ။ ဆား၊ နနွင်းထည့်ထောင်းပါ။
- ထောင်း၍ အသားများ စေးပိုင်လာလျှင် အဆုပ်ကလေးများဆုပ်ပါ။ ဆီပူတွင်ငါးဆုပ်များကို နီလာအောင် ကြော်ပြီး ဆယ်ထားပါ။
- စောစောက ချန်ထားသော ချင်း၊ ကြက်သွန်ထောင်းကို ဆီသတ်ပါ။ ဆီသတ်ပြီးလျှင် ပါးပါးလှီးထားသော ခရမ်းချဉ်သီးများ ထည့်၍မွှေပါ။ ဆား၊ ငံပြာရည် သင့်အောင်ထည့်ပါ။
- ခရမ်းချဉ်သီးနွမ်းလျှင် ငါးခူငါးဆုပ်များထည့်ပါ။ ရေအနည်းငယ်ထည့်၍ အဖုံးဖုံးပြီး ချက်ပါ။ ဆီပြန်လာလျှင် သုံးဆောင်နိုင်ပါပြီ။
-မာမာစိုး ရေးသားထားသော အိမ်ရှင်မများအတွက် နိုင်ငံတကာ ချက်နည်း ပြုတ်နည်း မှကူးယူဖော်ပြသည်။
