- ဤကမ္ဘာတွင် လူဟူသမျှတို့သည် မိသားစု အဖွဲ့ဝင် ညီအစ်ကို မောင်နှမများသဖွယ် ဖြစ်၏။ ထို့ကြောင့် သင်သည် လူချင်း ဆက်ဆံရာ၌ ကြင်နာစွာ၊ ဖော်ရွေစွာ၊ ယဉ်ကျေးစွာ ပြုမူသင့်၏။
- လူ့အခွင့်အရေး ဟူသမျှတို့သည် ဆင်းရဲချမ်းသာ မရွေးစေရ၊ မျက်နှာကြီးငယ် မလိုက်စေရ၊ ဖို မ မရွေးစေရ၊ အဖြူအမည်း မခွဲစေရ၊ နိုင်ငံရေးဝါဒ ကိုးကွယ်သော ဘာသာ ကွဲပြားစေကာမူထပ်တူ ထပ်မျှ လူတိုင်းရရှိစေရမည်။
- သင်သည် အသက်ရှင်စွာ နေထိုင်ခွင့်ရှိ၏။ သင့်အား မည်သူမျှ သတ်ပစ်ခွင့်မရှိ။
- သင့်အား မည်သူကမျှ ကျွန်စာရင်း သွင်းခွင့်မရှိ။
- သင့်အား သိက္ခာပျက်လောက်အောင် မည်သူကမျှ အနာတရ ဖြစ်စေခြင်း၊ ဒဏ်ခတ်ခြင်း ပြုလုပ်ခွင့် မရှိ။
- သင်သွားလေရာ အရပ်၌ မည်သူမဆို သင့်အား လူကဲ့သို့ ဆက်ဆံစေရမည်။
- ဥပဒေအရ သင်သည် မည်သူနှင့်မဆို အခွင့်အရေးတန်းတူ ရရှိမည်ဖြစ်သည်။
- သင်၏ တစ်စုံတစ်ခုသော အခွင့်အရေးကို အခြားသူတစ်ဦးက ကျူးလွန်သည် ဖြစ်အံ့။ ထိုအခွင့်အရေး ပြန်လည် ရရှိစေရန် တရားရုံးတော်က သင့်အတွက်တောင်းဆိုပေးရမည်။
- သင်သည် ဥပဒေကို ကျူးလွန်သူ မဟုတ်က သင့်အားမည်သူကမှ ဖမ်းဆီးခြင်း၊ ထောင်ချခြင်း၊ နယ်နှင်ဒဏ် ပြည်နှင်ဒဏ်ခတ်ခြင်းများ မပြုလုပ်နိုင်။
- သင့်အား ဥပဒေကျူးလွန်သည်ဟု အပြစ်တင်ခံရအံ့။ ထိုအမှုအတွက် အဂတိ ကင်းရှင်းသော ရုံးတော်တွင် လူသိရှင်ကြား တရားမျှတစွာ စစ်ဆေးရမည်။ဆက်
- သင်၏ပြစ်ချက်ကို ရုံးတော်မှ အတည်မပြုမီ သင့်အားအပြစ်ရှိသူ တစ်ဦးအနေဖြင့် မဆက်ဆံစေရ။ ဥပဒေမတီထွင်မီက ဖြစ်ပွားခဲ့သော အမှုကိစ္စအတွက် သင့်အား အပြစ်မပေးနိုင်။ သင့်အား အပြစ်ဒဏ်ခတ်ရာတွင်လည်း ဥပဒေစာအုပ်၌ ပါရှိသော သတ်မှတ်ချက်ထက် ပိုမိုကြီးလေးခြင်း မရှိစေရ။
- ဥပဒေ၏ ခွင့်ပြုချက် မရှိဘဲ သင်၏စာများကို ဖောက်ဖတ်ခွင့်မရှိ။ သင်၏ အိမ်ခြံအတွင်းသို့ အခွင့်မရှိ မဝင်စေရ။
- သင်၏တိုင်းပြည်အတွင်း၌ သင်ကြိုက်သလို သွားလာနိုင်သည်။ သင့်တိုင်းပြည်မှ ထွက်ခွာခွင့်ရှိသည်။ ပြန်လာခွင့်လည်းရှိသည်။
- သင်၏တိုင်းပြည်တွင်း၌ သင့်အတွက်လုံခြုံမှုမရှိလျှင် လည်းကောင်း၊ တရားမျှတစွာ ဆက်ဆံမှုမရှိဟု ယူဆလျှင် လည်းကောင်း သင့်တိုင်းပြည်ကို စွန့်ခွာ၍ အခြားနိုင်ငံတစ်ခုသို့ပြောင်းရွှေ့ နေထိုင်ခွင့်ရှိသည်။ သင်သည် အပြစ်ရှိသူ မဟုတ်မှသာ ဤသို့ပြုမူနိုင်သည်။
- သင်သည် နိုင်ငံတစ်ခု၏ တိုင်းရင်းသားအဖြစ် ခံယူခွင့်ရှိသည်။ အခြားနိုင်ငံတစ်ခု၏ တိုင်းရင်းသားဖြစ်လိုကလည်း သင့်အားမည်သူမျှ ပိတ်ပင်တားဆီးခွင့်မရှိ။
- အရွယ်ရောက်သော ယောက်ျားနှင့် မိန်းမတို့သည် မိမိချစ်သူနှင့် လက်ထပ်ကာ အိမ်ရာထူထောင်နိုင်သည်။ သဘောတူညီမှုမရှိဘဲ ထိမ်းမြားပေးစားခြင်း မရှိစေရ။
- သင်တစ်ဦးတည်းဖြစ်စေ၊ အခြားသူများနှင့်ပူးတွဲ၍ဖြစ်စေ ပစ္စည်းပိုင်ဆိုင်ခွင့်ရှိသည်။ သဘာတူညီမှုမရှိဘဲ သင်၏ပစ္စည်းကို မည်သူမျှ ယူငင်ခြင်းမပြုနိုင်။ အကယ်၍ အစိုးရက အလိုရှိလျှင် မူကား သင်၏ပစ္စည်းကို သိမ်းယူခွင့်ရှိသည်။
- သင်သည် လွတ်လပ်စွာတွေးတောခွင့်၊ လွတ်လပ်စွာ ထင်မြင်ချက် ပေးခွင့်ရှိသည်။ သင်ကြိုက်နှစ်သက်ရာ ဘာသာကို ကိုးကွယ်နိုင်သည်။ မကြိုက်လျှင်လည်း အခြားဘာသာသို့ ကူးပြောင်းနိုင်ခွင့်ရှိသည်။
- သင်သည် ပြောလိုရာပြော၍ ရေးလိုရာရေးနိုင်ခွင့်ရှိသည်။ ကြိုက်နှစ်သက်ရာ နည်းလမ်းဖြင့် အကြံပေးခွင့်၊ အကြံသစ်ဉာဏ်သစ် ရယူခွင့်ရှိသည်။
- သင်သည် အစည်းအဝေး တက်ရောက်ခြင်း၊ အသင်းအဖွဲ့ ထူထောင်ခြင်း ပြုလုပ်နိုင်သည်။ သို့သော် ထိုသို့ ပြုလုပ်ခြင်းကြောင့် အများကို ဒုက္ခမရောက်စေရ။ သင်အလိုမရှိသော အစည်းအဝေးများကို အတင်းတက်ရောက်စေခြင်း၊ အသင်းအဖွဲ့များ၌ အတင်း ပါဝင်စေခြင်းများလည်း မရှိစေရ။
- သင်သည် လွတ်လပ်စွာ မဲပေးနိုင်သည်။ ရာထူးယူခွင့်လည်းရှိသည်။ အစိုးရက ပြည်သူကောင်းကျိုးအတွက် ပြုလုပ်သမျှတို့တွင် ပါဝင်အကျိုးခံစားခွင့်ရှိသည်။ ပြည်သူတို့ဆန္ဒကိုလည်း အစိုးရက လေးစားရမည်။
- အစိုးရက ပြည်သူများအား အငတ်ဘေး၊ ရောဂါဘေးစသည်တို့မှ ကာကွယ်ရေးပြုလုပ်ရာတွင် သင်လည်းပါဝင် အကျိုးခံစားခွင့်ရှိသည်။ သင်သည် လူစဉ်မီစွာ သိက္ခာရှိရှိ နေထိုင်ခွင့်ရှိသည်။
- သင်၏အရည်အချင်းအလျောက် အလုပ်အကိုင်ရှာဖွေခွင့်ရှိသည်။ လုံလောက်သော လခရရှိခွင့်၊ အလုပ်ချင်းတူလျှင် လခတူညီစွာရရှိခွင့်၊ အလုပ်ပြုတ်ခြင်းမှ ကာကွယ်ခွင့်၊ အလုပ်ခွင်သာယာခွင့်၊ အလုပ်သမား သမဂ္ဂထူထောင်ခွင့်တို့ ရှိစေရမည်။
- အလုပ်လုပ်ရာတွင် အပန်းဖြေခွင့်၊ သင့်တင့်သော အလုပ်ချိန် ကန့်သတ်ခြင်း၊ အချိန်ကာလ အားလျော်စွာ လခအပြည့်နှင့် ရက်အားများ ရရှိခွင့် ရှိစေရမည်။
- ကောင်းမွန်သော စားဝတ်နေရေး ရရှိစေရမည်။ ဆေးဝါးကုသခွင့်ရှိရမည်။ ကျန်းမာရေး ချို့တဲ့ချိန်၊ အိုမင်းမစွမ်း ဖြစ်ချိန်တို့၌ ပင်စင်လစာ ရရှိစေရမည်။ ကလေးသူငယ်များနှင့် မိခင်များအတွက် တူညီသော အခွင့်အရေးများနှင့်တကွ အထူးစောင့်ရှောက် ကြည့်ရှုမှုများ ရှိစေရမည်။
- မူလတန်းပညာရေးကို အခမဲ့ သင်ယူခွင့်ရှိသည်။ သင်တတ်နိုင်ပါက အထက်တန်းကျောင်းကြီးများတွင် ပညာဆက်လက် ဆည်းပူးခွင့်ရှိသည်။
- သိပ္ပံခေတ်၏ တိုးတက်မှု အရပ်ရပ်၌လည်းကောင်း၊ အနုပညာ ယဉ်ကျေးမှု အသွယ်သွယ်၌လည်းကောင်း သင်ပါဝင်ခံစားခွင့် ရှိသည်။ အကယ်၍ သင်ကိုယ်တိုင် သိပ္ပံပညာရှင်၊ သို့မဟုတ် အနုပညာရှင် ဖြစ်ပါက သင်၏တီထွင်မှု၊ ရေးသားဖန်တီးမှုတို့အတွက် ထိုက်သင့်သော အကျိုးခံစားခွင့်များ ရရှိစေရမည်။
- ဤအခွင့်အရေးများ အားလုံး ဖူးပွင့်ဝေဆာသော ပတ်ဝန်းကျင်နှင့် ကမ္ဘာကြီးတွင် သင်သည် ငြိမ်းချမ်း ပျော်ရွှင်စွာ နေထိုင်ခွင့်ရှိသည််။
- ဤသို့ နေထိုင်ရာတွင် အများပြည်သူတို့အတွက် သင်ကရွက်ဆောင်ဖွယ်ရှိသော တာဝန်တို့၌ သင်ကကျေပွန်ရမည်။ ထိုတာဝန်များကို ရွက်ဆောင်ရာ၌ သင်က သူတစ်ပါး၏ အခွင့်အရေးကို မကျူးလွန်မိစေရန်ကိုလည်း အမြဲသတိပြုရမည်။
- မည်သူမဆို အစိုးရပင်ဖြစ်စေ၊ သာမန်လူတစ်ဦးပင်ဖြစ်စေ ဤလူ့အခွင့်အရေး ကြေညာစာတမ်း၌ ပါရှိသော အချက်အလက်တို့ကိုချိုးဖဲ့ ဖျက်စီးခွင့် လုံးဝမရှိစေရ။
ညိုမြရေးသားသော အိုးဝေ လက်ဖက်ရည်ကြမ်းဝိုင်း စာအုပ်မှ ကူးယူဖော်ပြထားသည်။
