ဆော့ခရတ္တိ၏ သူရသတ္တိ အယူအဆ (အပိုင်း – ၂)

စာပိုဒ် ၁၇

လက်။     ။ ဆော့ခရတ္တိ၊ မခဲယဉ်းလှပါ၊ ပြောပြပါမည်၊ အကြင်သူသည် တာဝန်ကျရာ စစ်မြေပြင်တွင် ကြံ့ကြံ့ခံ၍ ရန်သူကို တွန်းလှန်၏၊ မဆုတ်မခွာနေ၏၊ ထိုသူသည် သူရသတ္တိ နှင့် ပြည့်စုံသူပေတည်း။

ဆော့။     ။ အချင်း လက်ခီ၊ အသင်၏ အဖြေသည် ရှင်းပါပေသည်၊ သို့ရာတွင် အသင်၏အဖြေသည် ကျွန်ုပ်အလိုရှိသော အဖြေမဟုတ်သေးပါ။ စင်စစ်မှာ အသင့်ကို ကျွန်ုပ်မေးစဉ်က ကျွန်ုပ်၏အမေးသည် မသေချာခဲ့ပါ။ ကျွန်ုပ်၏အမေး မသေချာခဲ့သဖြင့် ကျွန်ုပ်အလိုရှိသောအဖြေကို မရသည်မှာ ကျွန်ုပ်၏အပြစ်ကြောင့်သာ ဖြစ်သည်။

လက်။     ။ ဆော့ခရတ္တိ၊ ပသို့နည်း။ အမေးမသေချာဟု အသင်ဆိုရာတွင် အဘယ်ကို အသင်ဆိုလိုသနည်း။

ဆော့။     ။ ကျွန်ုပ်ဆိုလိုသည်ကို ပြောပါမည်။ အသင်ဆိုခဲ့သည့်အတိုင်း တာဝန်ကျရာ စစ်မြေပြင်တွင် ကြံ့ကြံ့ခံ၍ တွန်းလှန်သူသည် သူရသတ္တိဖြစ်၏ ဟု ကျွန်ုပ်လည်း သဘောရပါသည်။

လက်။     ။ ထိုသို့ပင် ကျွန်ုပ်ဆိုချင်သည်။

ဆော့။     ။ ထိုသို့ပင် ကျွန်ုပ်လည်း ဆိုချင်ပါသည်။ သို့ရာတွင် ကြံ့ကြံ့မခံဘဲ ဆုတ်ရင်းခွာရင်း တွန်းလှန်တိုက်ခိုက်သူကို အသင် ပသို့ဆိုမည်နည်း။

လက်။     ။ ဆော့ခရတ္တိ၊ ဆုတ်ရင်းခွာရင်း တွန်းလှန် တိုက်ခိုက်သူဆိုသည်ကို ရှင်းပြပါဦး။

ဆော့။     ။ ဆိသိအန်စစ်သည်တို့သည် တက်ရင်းလည်းတိုက်၍ ဆုတ်ရင်းလည်း ထိုက်ကြသောသူများ မဟုတ်ပါလော။ ထို့ပြင် ကျွန်ုပ်၏အထင်မှာ မဟာကဗျာစာဆို ဟိုးမားသည် ရထားစီးသူရဲ အိနိအက်တို့၏ စစ်မြင်းတို့ကို ချီးကျူးဖွဲ့ဆိုရာတွင် ထိုစစ်မြင်းတို့သည် ရန်သူနောက်သို့ လိုက်ကြရမည်အခါကိုလည်း သိကြ၏၊ ထိုဖက်သို့လည်းကောင်း၊ ဤဖက်သို့လည်းကောင်း ကြောက်အားလန့်အားဖြင့် အပြေးအလွှားပြုကြရမည့်အခါကိုလည်း သိကြ၏ဟု ဖွဲ့ဆိုခဲ့သည် ထင်သည်။ ထို့ပြင် ရထားစီးသူရဲ အိနိအက်ကို ချီးကျူးဖွဲ့ဆိုရာတွင်လည်း အိနိအက်သည် ကြောက်သင့်သောအခါအခွင့်ကို သိတတ်သူလည်းဖြစ်၍ ရန်သူ အထင်မမှားအောင် ကြောက်ဟန်ဆောင်တတ်သူလည်း ဖြစ်၏ဟု ဖွဲ့ဆိုခဲ့သည် မဟုတ်ပါလော။

လက်။     ။ ဆော့ခရတ္တိ၊ အသင် ယခုဆိုသောစကားသည် ဆိုထိုက်သော စကားပေ၊ အဘယ့်ကြောင့်ဆိုသော် ဟိုးမားသည် မြင်းကသောရထားစစ်ပွဲအကြောင်းကို ဖွဲ့ဆိုနေသောကြောင့် ဖြစ်သည်၊ ထို့ပြင် အသင်ဆိုခဲ့သော ဆိသိအန်စစ်သည် ဆိုသည်မှာလည်း မြင်းစီးသူရဲ ဖြစ်သောကြောင့်ပင်။ မြင်းစီး၍ ထိုးကြသော စစ်ပွဲမျိုးတွင် အပြေးအလွှား ဆုတ်ခွာ၍ စစ်တိုက်ခြင်းသည် မြင်းစီးသူရဲတို့ သုံးမြဲဖြစ်သော စစ်ပရိယာယ်မျှသာ ဖြစ်သည်။ ကျွန်ုပ်ဆိုလိုသော စစ်သည်ကား ခြေသည်သူရဲပင် ဖြစ်သည်၊ ခြေသည်သူရဲမှန်လျှင် ကြံ့ကြံ့ခံ၍ တိုက်ရမည်သာ။

ဆော့။     ။ အချင်း လက်ခီ၊ စပါတာစစ်သည် သည် ခြေသည်သူရဲ ဖြစ်သည်။ စပါတာ ခြေသည်သူရဲကိုကား အသင်ခြွင်းချက်ပြုရလိမ့်မည်၊ ကျွန်ုပ်ကြားဖူးသည်မှာ ဤသို့ဖြစ်သည်။ သစ်ကိုင်းသစ်ခက်တို့ဖြင့် ဖွတ်မြီးထိုးရက်ထားသော ဒိုင်းလွှားတို့ကို ကိုင်လျက် အုပ်ဖွဲ့ ချီတက်လာတတ်သော ပါရှင်စစ်သည်တို့ကို မြင်ကြသောအခါ စပါတာစစ်သည်တို့သည် ကြံ့ကြံ့မခံလိုကြ၊ မိမိတို့၏စစ်ကြောင်းမှ ဆုတ်ကြသည်။ သို့ရာတွင် ချီတက်လာသော ပါရှင်စစ်တပ်တွင် လူအုပ်ကွဲသည်နှင့်တစ်ပြိုင်နက် ထိုစပါတာစစ်သည်တို့သည် မြင်းတပ်ကဲ့သို့ ပြန်လှည့်၍ တိုက်ကြသည်ဖြစ်ရာ အောင်ပွဲရကြသည်၊ ဤသို့လျှင် ကျွန်ုပ်ကြားဖူးသည်။

လက်။     ။ ဆော့ခရတ္တိ၊ ဟုတ်ပါပေသည်။

စာပိုဒ် ၁၈

ဆော့။     ။ ကျွန်ုပ်အမေး မသေချာသောကြောင့် ကျွန်ုပ် အလိုရှိသောအဖြေကို မရသည်မှာ ကျွန်ုပ်၏အပြစ်ကြောင့် ဖြစ်၏ဟု ကျွန်ုပ်ဆိုခဲ့ခြင်းသည် ထိုအကြောင်းကြောင့်ပင် ဖြစ်သည်။ စင်စစ်မှာ ကျွန်ုပ်သည် လက်နက်စွဲခြေသည်သူရဲတို့၏ သူရသတ္တိလောက်ကိုသာ သိလိုသည်မဟုတ်၊ မြင်းစီးသူရဲတို့၏ သူရသတ္တိကိုလည်း သိလိုသည်။ စစ်သည်ဟူသမျှ၏ သူရသတ္တိကို သိလိုခြင်းဖြစ်သည်။ ထို့ပြင် စစ်မြေပြင်တွင် ရဲရင့်ကြသောသူတို့၏ သူရသတ္တိကိုသာမက သမုဒ္ဒရာလေလှိုင်းတို့တွင်လည်းကောင်း၊ အနာရောဂါ၏ အနှိပ်အစက်ကို ခံကြရသောအခါတွင်လည်းကောင်း၊ ဆင်းရဲခြင်းနှင့် ကြုံကြရသောအခါတွင်လည်းကောင်း၊ နိုင်ငံ့အရေးအရာ အစီအမံ အဆောင်အရွက်တို့တွင်လည်းကောင်း ရဲရင့်ကြသော သူတို့၏ သူရသတ္တိကိုလည်း သိလိုသည်။ ထို့ပြင် အနာအကျင် ခံစားကြရသော အခါတွင်လည်းကောင်း၊ ကြောက်စရာလန့်စရာတို့နှင့် ရင်ဆိုင်ကြရသောအခါတွင် လည်းကောင်း ရဲရင့်ကြသော သူတို့၏ သူရသတ္တိကိုလည်း သိလိုသည်။ ထိုမျှသာ မကသေးပါ၊ တဏှာလောဘကိုလည်းကောင်း၊ ကာမဂုဏ်အာရုံတို့ကို လည်းကောင်း ကြံ့ကြံ့ခံ၍ဖြစ်စေ၊ ဆုတ်ပြီးမှ ပြန်လည်တိုက်ခိုက်၍ ဖြစ်စေ တွန်းလှန်ရဲကြသော သူတို့၏ သူရသတ္တိကိုလည်း သိလိုသည်။ အချင်းလက်ခီ၊ ထိုသတ္တိမျိုးသည် လောကတွင် ရှိသည်မဟုတ်ပါလော။

လက်။     ။ ရှိပါသည်။

ဆော့။     ။ ကျွန်ုပ် ယခုဆိုခဲ့သောသူအားလုံးသည် သူရသတ္တိ ရှိကြသူချည်း ဖြစ်သည်၊ သို့ရာတွင် အချို့သည် ကာမဂုဏ်အာရုံတို့ကို တွန်းလှန်ကြရာတွင်သာ ရဲရင့်ကြသည်၊ အချို့သည် အနာအကျင် ခံစားကြရာတွင်သာ ရဲရင့်ကြသည်၊ အချို့သည် ကြောက်စရာလန့်စရာတို့နှင့် ရင်ဆိုင်ကြရာတွင်သာ ရဲရင့်ကြသည်။ ထို့ပြင် ဆိုခဲ့သော အရေးကိစ္စအမျိုးမျိုးတွင် ရဲရင့်သူများ ရှိကြသကဲ့သို့ သူရဲဘောနည်းသူများလည်း ရှိကြသည်။ ထိုသို့ မဟုတ်ပါလော။

လက်။     ။ ဟုတ်ပါသည်။

ဆော့။     ။ ကျွန်ုပ်သိချင်သည်မှာ ရဲရင့်သူအမျိုးမျိုးတွင် ရှိသော သူရသတ္တိ၏ သဘောဖြစ်သည်။ သူရဲဘောနည်းသူအမျိုးမျိုးတွင် ရှိသော သူရဲဘောနည်းခြင်း၏ သဘောဖြစ်သည်။ ရှေးဦးစွာ သူရသတ္တိ၏ သဘောကို သိချင်ပါသည်။ ထို့ကြောင့် မေးပါဦးမည်၊ ရဲရင့်ပုံအမျိုးမျိုးတွင် သဘောတစ်မျိုးတည်းအဖြစ်ဖြင့် မဖောက်မပြန် ပါတတ်သည်လည်းဖြစ်၍ သူရသတ္တိဟု ဆိုအပ်သည်လည်း ဖြစ်သော သဘောသည် အဘယ်နည်း၊ ကျွန်ုပ်အလိုရှိသော အဖြေအတွက် မေးချင်သော မေးခွန်းသည် ဤမေးခွန်း ဖြစ်သည်။ အချင်း လက်ခီ၊ ဤမေးခွန်းကို အသင် သဘောပေါက်ပြီဟု ထင်ပါသည်။

လက်။     ။ ဆော့ခရတ္တိ၊ ကောင်းကောင်း သဘောမပေါက်သေးပါ။

ဆရာဇော်ဂျီ ဘာသာပြန်ဆိုထားသော ပလေးတိုးနိဒါန်း မှ ကူးယူဖော်ပြသည်။